{"kind":"section","lang":"la","language":"Latin","title":"Cento 186-227","citation":"Proba, Cento 186-227","ref":"186","level":null,"urn":null,"url":"https://interlinea.aeterna-institute.org/library/latin/proba/cento/186","api":"https://interlinea.aeterna-institute.org/api/v1/library/latin/proba/cento/186","markdown":"https://interlinea.aeterna-institute.org/library/latin/proba/cento/186.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":279,"text":"Strata iacent passim sua quaeque sub arbore poma,\nPocula sunt fontes liquidi: caelestia dona\nAdtractare nefas: id rebus defuit unum.\nQuid prohibet causas penitus temptare latentes?\nVana superstitio. rerum pars altera adempta est.\nQuo uitam dedit aeternam? cur mortis adempta est\nCondicio? mea si non irrita dicta putaris,\nAuctor ego audendi sacrata resoluere iura.\nTu coniunx, tibi fas animum temptare precando.\nDux ego uester ero: tua si mihi certa uoluntas,\nExtruimusque toros dapibusque epulamur opimis.'\nSic ait, et dicto citius, quod lege tenetur,\nSubiciunt epulis olim uenerabile lignum\nInstituuntque dapes contactuque omnia foedant.\nPraecipue infelix pesti deuota futurae\nMirataque nouas frondes et non sua poma,\nCausa mali tanti, summo tenus attigit ore.\nMaius adorta nefas maioremque orsa furorem\nHeu misero coniunx aliena ex arbore germen\nObicit atque animum subita dulcedine mouit.\nContinuo noua lux oculis effulsit; at illi\nTerrentur uisu subito nec plura morati\nCorpora sub ramis obtentu frondis inumbrant:\nConsertum tegumen: nec spes opis ulla dabatur.\nAt non haec nullis hominum rerumque repertor\nObseruans oculis caedes et facta tyranni\nPraesensit: notumque furens quid femina posset.\nContinuo inuadit: 'procul, o procul este profani\nConclamat, caelum ac terras qui numine firmat.\nAtque illi longe gradientem ac dira frementem\nVt uidere, metu uersi retroque ruentes\nDiffugiunt siluasque et sicubi concaua furtim\nSaxa petunt. piget incepti lucisque, neque auras\nDispiciunt: taedet caeli conuexa tueri.\nNec longum in medio tempus, cum creber ad auras\nVisus adesse pedum sonitus genitorque per auras\nHunc, ubi uix multa maestum cognouit in umbra\nTalibus alloquitur dictis atque increpat ultro:\n'Infelix, quae tanta animum dementia cepit?\nQuis furor iste nouus? quo nunc, quo tenditis' inquit\n'Regnorum immemores, quae mentem insania mutat?\nDicite, quae lucis miseris tam dira cupido?","prev":{"citation":"Cento 136-185","label":"Lines 136-185","url":"https://interlinea.aeterna-institute.org/library/latin/proba/cento/136","api":"https://interlinea.aeterna-institute.org/api/v1/library/latin/proba/cento/136"},"next":{"citation":"Cento 228-271","label":"Lines 228-271","url":"https://interlinea.aeterna-institute.org/library/latin/proba/cento/228","api":"https://interlinea.aeterna-institute.org/api/v1/library/latin/proba/cento/228"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}