{"kind":"section","lang":"la","language":"Latin","title":"Cento 228-271","citation":"Proba, Cento 228-271","ref":"228","level":null,"urn":null,"url":"https://interlinea.aeterna-institute.org/library/latin/proba/cento/228","api":"https://interlinea.aeterna-institute.org/api/v1/library/latin/proba/cento/228","markdown":"https://interlinea.aeterna-institute.org/library/latin/proba/cento/228.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":298,"text":"Maturate fugam totoque absistite luco:\nNec reuocare gradum, si quando aduersa uocarint,\nEst licitum; flammis ambit torrentibus amnis\nPer medium stridens torquetque sonantia saxa\nAttollitque globos flammarum et sidera lambit.\nIlle sub haec: 'tua me, genitor, tua tristis imago\nHis posuere locis: merui nec deprecor', inquit\n'Omnipotens, sonitumque pedum uocemque tremesco\nConscius audacis facti: monitisque sinistris\nFemina fert tristis sucos tardumque saporem.\nIlla dolos dirumque nefas sub pectore uersans\nInsontem infando indicio, moritura puella\nDum furit, incautum crudeli morte peremit;\nSuasit enim, scis ipse, neque est te fallere cuiquam.\nVt uidi, ut perii, ut me malus abstulit error,\nContigimusque manu quod non sua seminat arbor.'\nTum pater omnipotens solio sic infit ab alto:\n'Accipite ergo animis atque haec mea figite dicta:\nTuque prior, scelere ante alios immanior omnis,\nQuem nec longa dies pietas nec mitigat ulla,\nHortator scelerum, coluber, mala gramina pastus\nDesidia latamque trahens inglorius aluum\nCede locis, nullis hominum cogentibus, ipse,\nTenuis(==TENVIS) ubi argilla et dumosis calculus aruis.'\n'At tibi pro scelere' exclamat, 'pro talibus ausis\nOmne aeuum ferro teritur, primusque per artem\nHeu miserande puer, terram insectabere rastris\nEt sonitu terrebis aues: horrebit in aruis\nCarduus et spinis surget paliurus acutis\nLappaeque tribolique et fallax herba ueneni.\nAt si triticeam in messem robustaque farra\nExercebis humum, frustra spectabis aceruum\nConcussaque famem in siluis solabere quercu.\nInsuper his subeunt morbi tristisque senectus\nEt labor et durae rapit inclementia mortis.\nHaec tibi semper erunt, tuque, o saeuissima coniunx,\nNon ignara mali, caput horum et causa malorum,\nMagna lues commissa tibi: heu perdita nescis\nNec quae te circum stent deinde pericula cernis.\nNunc morere, ut merita es, tota quod mente petisti:\nNec mea iam mutata loco sententia cedit.'\nAt iuuenem primum saeuus circumstetit horror:\nDeriguere oculi, nec se celare tenebris\nAmplius aut notas audire et reddere uoces.","prev":{"citation":"Cento 186-227","label":"Lines 186-227","url":"https://interlinea.aeterna-institute.org/library/latin/proba/cento/186","api":"https://interlinea.aeterna-institute.org/api/v1/library/latin/proba/cento/186"},"next":{"citation":"Cento 272-316","label":"Lines 272-316","url":"https://interlinea.aeterna-institute.org/library/latin/proba/cento/272","api":"https://interlinea.aeterna-institute.org/api/v1/library/latin/proba/cento/272"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}