{"kind":"section","lang":"la","language":"Latin","title":"Cento 272-316","citation":"Proba, Cento 272-316","ref":"272","level":null,"urn":null,"url":"https://interlinea.aeterna-institute.org/library/latin/proba/cento/272","api":"https://interlinea.aeterna-institute.org/api/v1/library/latin/proba/cento/272","markdown":"https://interlinea.aeterna-institute.org/library/latin/proba/cento/272.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":288,"text":"Haut mora, festinant iussi rapidisque feruntur\nPassibus, et pariter gressi per opaca uiarum\nCorripiunt spatium medium limenque relinquunt\nFlentes et paribus curis uestigia figunt.\nTum uictum in siluis bacas lapidosaque corna\nDant rami et uulsis pascunt radicibus herbae.\nInterea magnum sol circumuertitur annum:\nMatri longa decem tulerunt(==TU-LE-RUNT) fastidia menses,\nVnde homines nati, durum genus. inde per artem\nAut herbae campo apparent aut arbore frondes,\nInque nouos soles audent se gramina tuto\nCredere: et lentis uuam demittere ramis\nInstituunt udoque docent inolescere libro.\nTum, gemini fratres adolent dum altaria taedis,\nAlter in alterius praelato inuidit honore\n(Horresco referens) consanguinitate propinquum\nExcipit incautum patriasque obtruncat ad aras\nSanguine foedantem quos ipse sacrauerat ignis.\nTum genitor uirus serpentibus addidit atris\nMellaque decussit foliis ignemque remouit\nPraedarique lupos iussit pontumque moueri\nEt passim riuis currentia uina repressit.\nMox et frumentis labor additus, ut mala culmos\nEsset robigo et uictum seges aegra negaret.\nTum laqueis captare feras et fallere uisco\nInuentum, et duris urgens in rebus egestas\nMouit agros, curis acuens mortalia corda,\nDeterior donec paulatim ac decolor aetas,\nFerrea progenies, duris caput extulit aruis\nEt belli rabies et amor successit habendi.\nIustitia excedens terris uestigia fecit.\nNec longum in medio tempus: furor iraque mentem\nPraecipitant: gaudent perfusi sanguine fratrum.\nCondit opes alius defossoque incubat auro\nNec doluit miserans inopem dextramque tetendit.\nTum pater omnipotens grauiter commotus ab alto\nAethere se mittit: tellurem effundit in undas\nDiluuio miscens caelumque in Tartara soluit.\nSternit agros, sternit sata laeta bouumque labores\nDiluit: implentur fossae et caua flumina crescunt:\nEt genus omne neci pecudum dedit omne ferarum.\nTum pietate grauem ac meritis (mirabile dictu),\nQui fuit in terris et seruantissimus aequi,\nEripuit leto, tantis surgentibus undis,\nVt genus unde nouae stirpis reuocetur haberet.","prev":{"citation":"Cento 228-271","label":"Lines 228-271","url":"https://interlinea.aeterna-institute.org/library/latin/proba/cento/228","api":"https://interlinea.aeterna-institute.org/api/v1/library/latin/proba/cento/228"},"next":{"citation":"Cento 317-361","label":"Lines 317-361","url":"https://interlinea.aeterna-institute.org/library/latin/proba/cento/317","api":"https://interlinea.aeterna-institute.org/api/v1/library/latin/proba/cento/317"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}