{"kind":"section","lang":"la","language":"Latin","title":"Cento 317-361","citation":"Proba, Cento 317-361","ref":"317","level":null,"urn":null,"url":"https://interlinea.aeterna-institute.org/library/latin/proba/cento/317","api":"https://interlinea.aeterna-institute.org/api/v1/library/latin/proba/cento/317","markdown":"https://interlinea.aeterna-institute.org/library/latin/proba/cento/317.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":285,"text":"Diluuio ex illo patribus dat iura uocatis\nOmnipotens: magnis agitant sub legibus aeuum.\nQuid memorem infandas caedes, quid facta tyranni\nNesciaque humanis precibus mansuescere corda,\nAegyptum uiresque orientis et ultima bella\nMagnanimosque duces totiusque ordine gentis,\nQuo cursu deserta petiuerit et tribus et gens\nMagna uirum, meriti tanti non immemor umquam,\nQuique sacerdotes casti altaria iuxta,\nQuique pii uates pro libertate ruebant,\nQui bello exciti reges, quae litore rubro\nComplerint campos acies, quibus arserit armis\nRex, genus egregium, magno inflammante furore,\nAgmen agens equitum et florentis aere cateruas?\nCetera facta patrum pugnataque in ordine bella\nPraetereo atque aliis post me memoranda relinquo.\nNunc ad te et tua magna, pater, consulta reuertor.\nMaius opus moueo: uatum praedicta priorum\nAggredior, quamuis angusti terminus aeui\nAccipiat, temptanda uia est, qua me quoque possim\nTollere humo et nomen fama tot ferre per annos,\nQuod tua progenies caelo descendit ab alto,\nAttulit et nobis aliquando optantibus aetas.\nAuxilium aduentumque dei, quom femina primum\nVirginis os habitumque gerens (mirabile dictu)\nNec generis nostri puerum nec sanguinis edit,\nSeraque terrifici cecinerunt omina uates\nAduentare uirum populis terrisque superbum\nSemine ab aetherio, qui uiribus occupet orbem.\nIamque aderat promissa dies, quo tempore primum\nExtulit os sacrum diuinae stirpis origo\nMissus in imperium, uenitque in corpore uirtus\nMixta deo: subiit cari genitoris imago.\nHaut mora, continuo caeli regione serena\nStella facem ducens multa cum luce cucurrit.\nAgnouere deum proceres cunctisque repente\nMuneribus cumulant et sanctum sidus adorant.\nTum uero manifesta fides clarumque paternae\nNomen erat uirtutis: et ipsi agnoscere uultus\nFlagrantisque dei diuini signa decoris.\nProtinus ad regem magno feruore ruentum\nFama uolat magnisque acuit rumoribus iras\nIncenditque animum matrisque allabitur auris.\nIlla dolos dirumque nefas haut nescia rerum\nPraesensit motusque excepit prima futuros.","prev":{"citation":"Cento 272-316","label":"Lines 272-316","url":"https://interlinea.aeterna-institute.org/library/latin/proba/cento/272","api":"https://interlinea.aeterna-institute.org/api/v1/library/latin/proba/cento/272"},"next":{"citation":"Cento 362-408","label":"Lines 362-408","url":"https://interlinea.aeterna-institute.org/library/latin/proba/cento/362","api":"https://interlinea.aeterna-institute.org/api/v1/library/latin/proba/cento/362"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}