{"kind":"section","lang":"la","language":"Latin","title":"Cento 362-408","citation":"Proba, Cento 362-408","ref":"362","level":null,"urn":null,"url":"https://interlinea.aeterna-institute.org/library/latin/proba/cento/362","api":"https://interlinea.aeterna-institute.org/api/v1/library/latin/proba/cento/362","markdown":"https://interlinea.aeterna-institute.org/library/latin/proba/cento/362.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":298,"text":"Praescia uenturi furtim mandarat alendum,\nDum curae ambiguae, dum mens exaestuat ira.\nAt rex sollicitus stirpem et genus omne futurum\nPraecipitare iubet subiectisque urere flammis,\nMulta mouens, mittique uiros, qui certa reportent\nHaut secus ac iussi faciunt rapidisque feruntur\nPassibus et magnis urbem terroribus implent.\nContinuo auditae uoces uagitus et ingens\nInfantumque animae flentes: ante ora parentum\nCorpora natorum sternuntur limine primo.\nAt mater gemitu non frustra exterrita tanto,\nIpsa sinu prae se portans, turbante tumultu,\nInfantem fugiens plena ad praesaepia reddit.\nHic natum angusti subter fastigia tecti\nNutribat teneris immulgens ubera labris.\nHic tibi prima, puer, fundent cunabula flores,\nMixtaque ridenti passim cum baccare tellus\nMolli paulatim colocasia fundet acantho.\nEt iam finis erat perfecto temporis orbe.\nVt primum cessit furor et rabida ora quierunt,\nAnte annos animumque gerens caelestis origo\nPer medias urbes graditur populosque propinquos.\nIllum omnis tectis agrisque effusa iuuentus\nAttonitis inhians animis prospectat euntem,\nTurbaque miratur matrum: 'qui spiritus illi,\nQui uultus uocisque sonus uel gressus eunti est!'\nContinuo uates (namque is certissimus auctor)\nVt procul egelido secretum flumine uidit,\n'Tempus ait: deus, ecce, deus, cui maxima rerum\nVerborumque fides. tu nunc eris alter ab illo,\nFortunate puer, caeli cui sidera parent.\nSic equidem ducebam animo rebarque futurum:\nExpectate uenis, spes et solacia nostri'.\nHaec ubi dicta dedit, fluuio mersare salubri\nAccepit uenientem ac mollibus extulit undis:\nExultantque uada ac subito commota columba\nDeuolat et supra caput astitit. inde repente\nRadit iter liquidum celeris neque commouet alas.\nHuc omnis turba ad ripas effusa ruebat\nCertatim largos umeris infundere rores.\nTum genitor natum dictis compellat amicis:\n'Nate, meae uires, mea magna potentia solus\nEt praedulce decus magnum rediture parenti,\nA te principium, tibi desinet. accipe, testor,\nO mea progenies: qua sol utrumque recurrens\nAspicit Oceanum, perfecto laetus honore\nOmnia sub pedibus uertique regique uidebis.","prev":{"citation":"Cento 317-361","label":"Lines 317-361","url":"https://interlinea.aeterna-institute.org/library/latin/proba/cento/317","api":"https://interlinea.aeterna-institute.org/api/v1/library/latin/proba/cento/317"},"next":{"citation":"Cento 409-450","label":"Lines 409-450","url":"https://interlinea.aeterna-institute.org/library/latin/proba/cento/409","api":"https://interlinea.aeterna-institute.org/api/v1/library/latin/proba/cento/409"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}