{"kind":"section","lang":"la","language":"Latin","title":"Cento 409-450","citation":"Proba, Cento 409-450","ref":"409","level":null,"urn":null,"url":"https://interlinea.aeterna-institute.org/library/latin/proba/cento/409","api":"https://interlinea.aeterna-institute.org/api/v1/library/latin/proba/cento/409","markdown":"https://interlinea.aeterna-institute.org/library/latin/proba/cento/409.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":280,"text":"Tu regere imperio populos, matresque uirosque,\nIam pridem resides animos desuetaque corda\nIgnarosque uiae mecum miseratus inertes\nAggredere et uotis iam nunc adsuesce uocari'.\nDixerat: ille patris magni parere parabat\nImperio, instans operi regnisque futuris.\nHeu pietas, heu prisca fides! quas dicere grates\nIncipiam, si parua licet componere magnis?\nNec mihi iam patriam antiquam spes ulla uidendi\nNec spes libertatis erat nec cura salutis.\nHic mihi responsum primus dedit ille petenti,\nConcretam exemit labem purumque reliquit\nAetherium sensum meque in mea regna remisit.\nIllum ego per flammas, agerem si Syrtibus exul,\nPer uarios casus, per mille sequentia tela,\nQuo res cumque cadent, unum pro nomine tanto\nExsequerer strueremque suis altaria donis.\nHuius in aduentum tantarum in munera laudum\nIpsi laetitia uoces ad sidera iactant\nIntonsi montes: respondent omnia ualles.\nTempore non alio (magnum et memorabile nomen)\nSerpentis furiale malum meminisse necesse est.\nAusus quin etiam (fama est obscurior annis)\nCompellare uirum et ueniendi poscere causas.\nHunc ubi tendentem aduersum per gramina uidit,\nSubstitit infremuitque feros dominumque potentem\nSaucius ac serpens adfatur uoce superba:\n'Verane te facies, uerus mihi nuntius adfers?\nQui genus? unde domo, qui nostra ad limina tendis?\nFare age, quid uenias; nam te dare iura loquuntur.\nAut quis te, iuuenum confidentissime, nostras\nIussit adire domus pacique imponere morem?\nNon equidem inuideo, miror magis: accipe porro,\nQuid dubitem et quae nunc animo sententia surgat.\nEst domus alta: uoca zephyros et labere pinnis\nArdua tecta petens, ausus te credere caelo,\nSi modo quem memoras pater est, cui sidera parent'.\nOlli subridens sedato pectore fatur\nHaut uatum ignarus uenturique inscius aeui:\nDissimulare etiam sperasti, perfide serpens?\nNe dubita; nam uera uides. opta ardua pinnis\nAstra sequi clausumque caua te condere terra.","prev":{"citation":"Cento 362-408","label":"Lines 362-408","url":"https://interlinea.aeterna-institute.org/library/latin/proba/cento/362","api":"https://interlinea.aeterna-institute.org/api/v1/library/latin/proba/cento/362"},"next":{"citation":"Cento 451-494","label":"Lines 451-494","url":"https://interlinea.aeterna-institute.org/library/latin/proba/cento/451","api":"https://interlinea.aeterna-institute.org/api/v1/library/latin/proba/cento/451"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}