{"kind":"section","lang":"la","language":"Latin","title":"Cento 451-494","citation":"Proba, Cento 451-494","ref":"451","level":null,"urn":null,"url":"https://interlinea.aeterna-institute.org/library/latin/proba/cento/451","api":"https://interlinea.aeterna-institute.org/api/v1/library/latin/proba/cento/451","markdown":"https://interlinea.aeterna-institute.org/library/latin/proba/cento/451.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":279,"text":"Quo periture ruis maioraque uiribus audes?\nCede deo, toto proiectus corpore terrae'.\nNec plura his: ille admirans uenerabile donum\nFronte premit terram et spumas agit ore cruentas\nContentusque fuga caecis se immiscuit umbris.\nInterea uolitans magnas it fama per urbes.\nConuenere uiri: mens omnibus una sequendi\nIn quascumque uelit pelago deducere terras.\nMulti praeterea, quos fama obscura recondit,\nConcurrunt fremitu denso stipantque frequentes\nExultantque animis; medium nam plurima turba\nHunc habet atque umeris extantem suspicit altis.\nPostquam altos uentum in montes, aeterna potestas\nIura dabat legesque uiris, secreta parentis,\nSpemque dedit dubiae menti curasque resoluit.\nConspicit ecce alios dextra laeuaque frequentis.\nQuos ubi confertos audere in proelia uidit,\nIncipit et dictis diuinum aspirat amorem:\n'Discite iustitiam moniti, succurrite fessis\nPro se quisque, uiri, quae cuique est copia, laeti\nCommunemque uocate deum. meliora sequamur\nQuoque uocat uertamus iter. uia prima salutis\nIntemerata fides et mens sibi conscia recti.\nVobis parta quies perfecto temporis orbe.\nNam qui diuitiis soli incubuere repertis\nNec partem posuere suis, dum uita maneret,\nPulsatusue parens et fraus innexa clienti,\nTum, cum frigida mors anima seduxerit artus,\nInclusi poenam expectant, quae maxima turba\nInfernisque cient tenebris ueterumque malorum\nSupplicia expendunt. aliis sub gurgite uasto\nInfectum eluitur scelus aut exuritur igni.\nTurbidus hic caeno uastaque uoragine gurges\nAestuat atque imo barathri eructat harenam.\nHinc exaudiri gemitus et saeua sonare\nVerbera, tum stridor ferri tractaeque catenae,\nSemper et obducta densantur nocte tenebrae.\nPraeterea quae dicam animis aduertite uestris.\nNon ego uos posthac caesis de more iuuencis\nReligione patrum truncis et robore nata\nMortaliue manu effigies et templa tueri\nAudiam: et haec repetens iterumque iterumque monebo:\nSed periisse semel satis est, natumque patremque\nProfuerit meminisse magis, si credere dignum est.","prev":{"citation":"Cento 409-450","label":"Lines 409-450","url":"https://interlinea.aeterna-institute.org/library/latin/proba/cento/409","api":"https://interlinea.aeterna-institute.org/api/v1/library/latin/proba/cento/409"},"next":{"citation":"Cento 495-538","label":"Lines 495-538","url":"https://interlinea.aeterna-institute.org/library/latin/proba/cento/495","api":"https://interlinea.aeterna-institute.org/api/v1/library/latin/proba/cento/495"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}