{"kind":"section","lang":"la","language":"Latin","title":"Cento 47-90","citation":"Proba, Cento 47-90","ref":"47","level":null,"urn":null,"url":"https://interlinea.aeterna-institute.org/library/latin/proba/cento/47","api":"https://interlinea.aeterna-institute.org/api/v1/library/latin/proba/cento/47","markdown":"https://interlinea.aeterna-institute.org/library/latin/proba/cento/47.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":286,"text":"Namque (fatebor enim) leuium spectacula rerum\nSemper equos atque arma uirum pugnasque canebam\nEt studio incassum uolui(==VOLUI) exercere laborem.\nOmnia temptanti potior sententia uisa est\nPandere res altas terra et caligine mersas.\nInque dies aliquid iam dudum inuadere magnum\nMens agitat mihi nec placida contenta quiete est.\nOre fauete omnes laetasque aduertite mentes,\nMatres atque uiri pueri innuptaeque puellae.\nPrincipio caelum ac terras camposque liquentes\nLucentemque globum lunae solisque labores\nIpse pater statuit, uos, o clarissima mundi\nLumina, labentem caelo quae ducitis annum.\nNam neque erant astrorum ignes nec lucidus aether,\nSet nox atra polum bigis subuecta tenebat,\nEt chaos in praeceps tantum tendebat ad umbras,\nQuantus ad aetherium caeli suspectus Olympum.\nTum pater omnipotens, rerum cui summa potestas,\nAera dimouit tenebrosum et dispulit umbras\nEt medium luci atque umbris iam diuidit orbem.\nSidera cuncta notat tacito labentia caelo\nIntentos uoluens oculos, qua parte calores\nAustrinos tulerit, quae terga obuerterit axi.\nPostquam cuncta uidet caelo constare sereno\nOmnipotens, stellis numeros et nomina fecit\nTemporibusque parem diuersis quattuor annum\nAestusque pluuiasque et agentes frigora uentos.\nAtque haec ut certis possimus discere signis,\nVere tument terrae et genitalia semina poscunt\nAc medio tostas aestu terit area fruges\nEt uarios ponit fetus autumnus et atra\nVenit hiemps: teritur Sicyonia baca trapetis:\nAtque in se sua per uestigia uoluitur annus.\nTempore iam ex illo fecundis imbribus aether\nMagnus alit magno commixtus corpore fetus.\nEt iam prima nouo spargebat lumine terras\nDucebatque diem stellis Aurora fugatis.\nTum durare solum et discludere Nerea ponto\nIncipit et rerum paulatim sumere formas,\nEt uariae pelagi facies immania cete\nAequora uerrebant caudis aestumque secabant.\nNec non et uasti circum gens umida ponti\nIam sole infuso, iam rebus luce retectis\nExultans rorem late dispergit amarum.","prev":{"citation":"Cento 1-46","label":"Lines 1-46","url":"https://interlinea.aeterna-institute.org/library/latin/proba/cento/1","api":"https://interlinea.aeterna-institute.org/api/v1/library/latin/proba/cento/1"},"next":{"citation":"Cento 91-135","label":"Lines 91-135","url":"https://interlinea.aeterna-institute.org/library/latin/proba/cento/91","api":"https://interlinea.aeterna-institute.org/api/v1/library/latin/proba/cento/91"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}