{"kind":"section","lang":"la","language":"Latin","title":"Cento 495-538","citation":"Proba, Cento 495-538","ref":"495","level":null,"urn":null,"url":"https://interlinea.aeterna-institute.org/library/latin/proba/cento/495","api":"https://interlinea.aeterna-institute.org/api/v1/library/latin/proba/cento/495","markdown":"https://interlinea.aeterna-institute.org/library/latin/proba/cento/495.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":297,"text":"Sed fugit interea, fugit irreparabile tempus,\nFlammarumque dies et uis inimica propinquat'.\nAdtonitis haesere animis: nec plura moratus\nHic aliud maius miseris mortalibus aegris\nIudicium canit (et tristis denuntiat iras)\nVenturum excidio et uasta conuulsa ruina\nOmnia tum pariter rutilo immiscerier igni\nPalantesque polo stellas caelique ruinam.\nTum uero tremefacta nouos per pectora cunctis\nInsinuat pauor, et taciti uentura uidebant.\nHaec super aduentu cum multa horrenda moneret,\nOra puer prima signans intonsa iuuenta,\nDiues opum, studiis florens ignobilis oti\n(Quinque greges illi balantum, quina redibant\nArmenta, et dapibus mensas onerabat inemptis\nContinuo alacris palmas utrasque tetendit\nEt genua amplectens sic ore effatus amico est:\n'O decus, o famae merito pars maxima nostrae,\nAd te confugio et supplex tua numina posco.\nOmnia praecepi atque animo mecum ante peregi.\nEripe me his, inuicte, malis. quid denique restat,\nQuidue sequens tantos possim superare labores?\nAccipe daque fidem: mihi iussa capessere fas est.'\nAtque huic responsum paucis ita reddidit heros:\n'O praestans animi iuuenis, absiste precando,\nNec te paeniteat: nihil o tibi amice relictum.\nHoc etiam his addam, tua si mihi certa uoluntas:\nDisce, puer, contemnere opes et te quoque dignum\nFinge deo, et quae sit poteris cognoscere uirtus.\nDa dextram misero et fratrem ne desere frater.\nSi iungi hospitio properat, coniunge uolentem.\nCasta pudicitiam seruet domus. en age segnes\nRumpe moras rebusque ueni non asper egenis.\nDixerat haec. ille in uerbo uestigia torsit\nTristior, ora modis adtollens pallida miris,\nMulta gemens, seque ex oculis auertit et aufert.\nInde ubi prima fides pelago, tranquilla per alta\nDeducunt socii nauis atque arte magistra\nHic alius latum funda transuerberat amnem\nAlta petens, pelagoque alius trahit umida lina.\nPostquam altum tenuere rates nec iam amplius ullae\nOccurrunt terrae, crebris micat ignibus aether,\nEripiunt subito nubes caelumque diemque,\nConsurgunt uenti et fluctus ad sidera tollunt.","prev":{"citation":"Cento 451-494","label":"Lines 451-494","url":"https://interlinea.aeterna-institute.org/library/latin/proba/cento/451","api":"https://interlinea.aeterna-institute.org/api/v1/library/latin/proba/cento/451"},"next":{"citation":"Cento 539-582","label":"Lines 539-582","url":"https://interlinea.aeterna-institute.org/library/latin/proba/cento/539","api":"https://interlinea.aeterna-institute.org/api/v1/library/latin/proba/cento/539"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}