{"kind":"section","lang":"la","language":"Latin","title":"Cento 539-582","citation":"Proba, Cento 539-582","ref":"539","level":null,"urn":null,"url":"https://interlinea.aeterna-institute.org/library/latin/proba/cento/539","api":"https://interlinea.aeterna-institute.org/api/v1/library/latin/proba/cento/539","markdown":"https://interlinea.aeterna-institute.org/library/latin/proba/cento/539.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":275,"text":"At sociis subita gelidus formidine sanguis\nDiriguit: cecidere animi cunctique repente\nPontum aspectabant flentes (uox omnibus una)\nSpemque metumque inter dubii, seu uiuere credant\nSiue extrema pati, leti discrimine paruo,\nQualia multa mari nautae patiuntur in alto.\nEcce deus magno misceri murmure pontum\nEmissamque hiemem sensit, cui summa potestas.\nPar leuibus uentis et fulminis ocior alis\nProna petit maria et pelago decurrit aperto:\nNec longo distat cursu praeeunte carina.\nAgnoscunt longe regem dextramque potentem\nNudati socii et magno clamore salutant.\nPostquam altos tetigit fluctus et ad aequora uenit,\nId uero horrendum ac uisu mirabile ferri:\nSubsidunt undae, remo ut luctamen abesset,\nCollectasque fugat nubes graditurque per aequor\nIam medium necdum fluctu latera ardua tinxit.\nAt media socios incedens naue per ipsos\nIpse gubernaclo rector subit, ipse magister.\nIntremuit malus, gemuit sub pondere cumba,\nVela cadunt, puppique deus consedit in alta:\nEt tandem laeti notae aduertuntur harenae.\nTunc etiam tardi costas agitator aselli\nInsedit nimbo effulgens: cui plurima circum\nMatres atque uiri, pueri uelamina nota\nSubiciunt funemque manu contingere gaudent.\nIamque propinquabant portis templumque uetustum\nAntiqua e cedro centum sublime columnis\nIngreditur magna medius comitante caterua.\nHorrendum siluis hoc illis curia templum,\nHae sacrae sedes, miro quod honore colebant.\nNamque sub ingenti lustrat dum singula templo,\nHorrescit uisu subito insonuitque flagello\nSignificatque manu et magno simul intonat ore:\n'Quae scelerum facies, quaeue aera micantia cerno\nCaesaris et nomen? quae mentem insania mutat?\nHae nobis propriae sedes, hic tempore certo\nPerpetuis soliti patrum considere mensis.\nObstipuere animis gelidusque per ima cucurrit\nOssa tremor, mensasque metu liquere priores.\nDeuexo interea propior fit Vesper Olympo.\nTum uictu reuocant uires fusique per herbam\nEt dapibus mensas onerant et pocula ponunt.","prev":{"citation":"Cento 495-538","label":"Lines 495-538","url":"https://interlinea.aeterna-institute.org/library/latin/proba/cento/495","api":"https://interlinea.aeterna-institute.org/api/v1/library/latin/proba/cento/495"},"next":{"citation":"Cento 583-627","label":"Lines 583-627","url":"https://interlinea.aeterna-institute.org/library/latin/proba/cento/583","api":"https://interlinea.aeterna-institute.org/api/v1/library/latin/proba/cento/583"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}