{"kind":"section","lang":"la","language":"Latin","title":"Cento 583-627","citation":"Proba, Cento 583-627","ref":"583","level":null,"urn":null,"url":"https://interlinea.aeterna-institute.org/library/latin/proba/cento/583","api":"https://interlinea.aeterna-institute.org/api/v1/library/latin/proba/cento/583","markdown":"https://interlinea.aeterna-institute.org/library/latin/proba/cento/583.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":290,"text":"Postquam prima quies epulis mensaeque remotae,\nIpse inter primos genitori instaurat honores,\nSuspiciens caelum. tum facta silentia linguis.\nDat manibus fruges dulcesque a fontibus undas\nImpleuitque mero pateram ritusque sacrorum\nEdocet immiscetque preces ac talia fatur:\n'Audite, o proceres,' ait 'et spes discite uestras.\nNemo ex hoc numero mihi non donatus abibit,\nPromissisque patris uestra' inquit munera uobis\nCerta manent, pueri, et palmam mouet ordine nemo.\nEt lux cum primum terris se crastina reddet,\nVnus erit tantum(==TANTUM_) in me exitiumque meorum,\nDum paci medium se offert de corpore nostro.\nIamque dies, nisi fallor, adest. secludite curas.\nMecum erit iste labor, nec me sententia fallit:\nVnum pro multis dabitur caput.' haec ita fatus\nConticuit seramque dedit per membra quietem.\nOceanum interea surgens Aurora reliquit.\nIamque sacerdotes late loca questibus implent\nCum populo patribus ferturque per agmina murmur.\nQuod genus hoc hominum, quaeue hunc tam barbara morem\nPermittit patria? poenas cum sanguine poscunt\nVndique collecti et magno clamore secuntur\nInsontem, saeuitque animis ignobile uulgus.\nSol medium caeli conscenderat igneus orbem,\nCum subito(==SUBITO_) acciri omnes, populusque patresque,\nExposcunt farique iubent, quo sanguine cretus\nQuidue petat quidue ipse ferat. praeclara tuentis\nFacta uiri mixtus dolor et stupor urguet inertis\n(Nescia mens hominum), certantque illudere capto.\nTum uero raptis concurrunt undique telis.\nTollitur in caelum clamor cunctique repente\nCorripuere sacram effigiem manibusque cruentis\nIngentem quercum decisis undique ramis\nConstituunt spirisque ligant ingentibus ipsum,\nTendebantque manus pedibus per mutua nexis\n(Triste ministerium), sequitur quos cetera pubes,\nAusi omnes immane nefas ausoque potiti.\nIlle autem impauidus 'quo uincula nectitis?' inquit\n'Tantane uos generis tenuit fiducia uestri?\nPost mihi non simili poena commissa luetis.'\nTalia perstabat memorans fixusque manebat.\nInterea magno misceri murmure caelum\nIncipit et rebus nox abstulit atra colorem\nImpiaque aeternam timuerunt saecula noctem.","prev":{"citation":"Cento 539-582","label":"Lines 539-582","url":"https://interlinea.aeterna-institute.org/library/latin/proba/cento/539","api":"https://interlinea.aeterna-institute.org/api/v1/library/latin/proba/cento/539"},"next":{"citation":"Cento 628-669","label":"Lines 628-669","url":"https://interlinea.aeterna-institute.org/library/latin/proba/cento/628","api":"https://interlinea.aeterna-institute.org/api/v1/library/latin/proba/cento/628"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}