{"kind":"section","lang":"la","language":"Latin","title":"Cento 628-669","citation":"Proba, Cento 628-669","ref":"628","level":null,"urn":null,"url":"https://interlinea.aeterna-institute.org/library/latin/proba/cento/628","api":"https://interlinea.aeterna-institute.org/api/v1/library/latin/proba/cento/628","markdown":"https://interlinea.aeterna-institute.org/library/latin/proba/cento/628.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":285,"text":"Terra tremit, fugere ferae et mortalia corda\nPer gentes humilis strauit pauor: inde repente\nDat tellus gemitum et caelum tonat omne fragore.\nExtemplo commotae Erebi de sedibus imis\nVmbrae ibant tenues. tellus quoque et aequora ponti\nSigna dabant: sistunt amnes terraeque dehiscunt.\nQuin ipsae stupuere domus atque intima Leti\nTartara et umbrosae penitus patuere cauernae.\nSol quoque et exoriens (cuncti se scire fatentur)\nTum caput obscura nitidum ferrugine texit.\nDiffugiunt comites et nocte teguntur opaca\nMultaque dura suo tristi cum corde uolutant.\nQuid faciant? haerent infixi pectore uultus\nVerbaque, nec placidam membris dat cura quietem.\nTum senior tales referebat pectore uoces\nMulta putans: 'ubi nunc nobis deus ille magister?\nQuem sequimur? quoue ire iubes, ubi ponere sedes?\nO dolor atque decus, tantarum gloria rerum!\nIam iam nulla mora est: et nos rape in omnia tecum\n(Oramus) teque aspectu ne subtrahe nostro.\nHos inter motus media inter talia uerba\nTertia lux gelidam caelo dimouerat umbram:\nIamque pedem referens superas ueniebat ad auras,\nCum subito ante oculos ingenti mole sepulchrum,\nCorpus ubi exanime positum, (nec claustra nec ipsi\nCustodes sufferre ualent) auulsaque saxis\nSaxa uident, laxis laterum compagibus artis.\nFit sonus: ingenti concussa est pondere tellus.\nHorror ubique animo, simul ipsa silentia terrent.\nEcce autem primi uolucrum sub culmine cantus:\nIngreditur linquens antrum, spoliisque superbus\nIbat ouans, pulsuque pedum tremit excita tellus,\nVulneraque illa gerens foribus sese intulit altis.\nAtque hic ingentem comitum adfluxisse nouorum\nInuenit admirans numerum cunctisque repente\nImprouisus ait: 'coram, quem quaeritis, adsum.\nVicit iter durum pietas et uiuida uirtus.\nPraecipites uigilate, uiri; timor omnis abesto.\nHi nostri reditus expectatique triumphi,\nHaec mea magna fides. o terque quaterque beati,\nQuae uobis, quae digna, uiri, pro laudibus istis\nPraemia posse rear solui, quae dona parari?","prev":{"citation":"Cento 583-627","label":"Lines 583-627","url":"https://interlinea.aeterna-institute.org/library/latin/proba/cento/583","api":"https://interlinea.aeterna-institute.org/api/v1/library/latin/proba/cento/583"},"next":{"citation":"Cento 670-694","label":"Lines 670-694","url":"https://interlinea.aeterna-institute.org/library/latin/proba/cento/670","api":"https://interlinea.aeterna-institute.org/api/v1/library/latin/proba/cento/670"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}