{"kind":"section","lang":"la","language":"Latin","title":"Cento 670-694","citation":"Proba, Cento 670-694","ref":"670","level":null,"urn":null,"url":"https://interlinea.aeterna-institute.org/library/latin/proba/cento/670","api":"https://interlinea.aeterna-institute.org/api/v1/library/latin/proba/cento/670","markdown":"https://interlinea.aeterna-institute.org/library/latin/proba/cento/670.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":163,"text":"Accipite ergo animis: quae uos a stirpe parentum\nPrima tulit tellus, eadem uos ubere laeto\nAccipiet. reuocate animum maestumque timorem\nMittite et uosmet rebus seruate secundis.\nQuod super est, laeti bene gestis ordine rebus\nPacem orate manu, pacem laudate sedentes\nMagnanimi; pacis solum inuiolabile pignus.'\nEt simul his dictis faciem ostendebat et ora,\nOra manusque ambas populataque pectora ferro:\nImmiscentque manus manibus gaudentque tuentes.\nNec uidisse semel satis est: iuuat usque morari\nEt conferre gradum et dextrae coniungere dextram.\nHis demum exactis spirantes dimouet auras:\nAera per tenerum caeloque inuectus aperto\nMortales uisus medio in sermone reliquit:\nAtque illum solio stellantis regia caeli\nAccipit aeternumque tenet per saecula nomen.\nEx illo celebratus honos, laetique minores\nSeruauere diem tot iam labentibus annis.\nI decus, i, nostrum, tantarum gloria rerum,\nEt nos et tua dexter adi pede sacra secundo\nAnnua, quae differre nefas. celebrate fauentes\nHunc, socii, morem sacrorum: hunc ipse teneto,\nO dulcis coniunx, et si pietate meremur,\nHac casti maneant in religione nepotes.","prev":{"citation":"Cento 628-669","label":"Lines 628-669","url":"https://interlinea.aeterna-institute.org/library/latin/proba/cento/628","api":"https://interlinea.aeterna-institute.org/api/v1/library/latin/proba/cento/628"},"next":null,"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}