{"kind":"section","lang":"la","language":"Latin","title":"Cento 91-135","citation":"Proba, Cento 91-135","ref":"91","level":null,"urn":null,"url":"https://interlinea.aeterna-institute.org/library/latin/proba/cento/91","api":"https://interlinea.aeterna-institute.org/api/v1/library/latin/proba/cento/91","markdown":"https://interlinea.aeterna-institute.org/library/latin/proba/cento/91.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":284,"text":"Postera iamque dies primo surgebat eoo.\nFundit humus flores et frondes explicat omnes\nSanguineisque inculta rubent auiaria bacis,\nNon rastris, hominum non ulli obnoxia curae.\nTertia lux gelidam caelo dimouerat umbram.\nAuia tum resonant auibus uirgulta canoris\nEt liquidas corui presso dant gutture uoces\nNec gemere aeria cessauit turtur ab ulmo.\nQuarto terra die uariarum monstra ferarum\nOmnigenumque pecus nullo custode per herbam\nEducit siluis subito mirabile uisu.\nTum demum mouet arma leo, tum pessima tigris\nSquamosusque draco et fulua ceruice leaena\nSaeuire ac formae magnorum ululare luporum.\nCetera pascuntur uirides armenta per herbas,\nNec gregibus liquidi fontes nec gramina desunt.\nIamque dies alterque dies processit, et omne\nHoc uirtutis opus diuinae mentis et haustus\nProspiciens genitor perfectis ordine rebus\nExpleri mentem nequit ardescitque tuendo\nTerrasque tractusque maris caelumque profundum,\nAlituum pecudumque genus, secumque uolutat,\nQui mare, qui terras omni dicione tenerent,\nNeu segnes iaceant terrae. iuuat usque morari.\nTalia uersanti subito sententia sedit,\nFelicemque trahit limum fingitque premendo\nPingue solum primis extemplo a mensibus anni.\nIamque improuiso tantae pietatis imago\nProcedit noua forma uiri pulcherrima primum,\nOs umerosque deo similis, cui mentem animumque\nMaior agit deus atque opera ad maiora remittit.\nQuaeritur huic alius; nec quisquam ex agmine tanto\nAudet adire uirum sociusque in regna uocari.\nHaut mora continuo placidam per membra quietem\nDat iuueni et dulci declinat lumina somno.\nAtque illi medio in spatio iam noctis opacae\nOmnipotens genitor costas et uiscera nudat.\nHarum unam iuueni laterum compagibus artis\nEripuit subitoque oritur mirabile donum\n(Argumentum ingens) claraque in luce refulsit\nInsignis facie et pulchro pectore uirgo,\nIam matura uiro, iam plenis nubilis annis.\nOlli somnum ingens rumpit pauor: ossaque et artus\nConiugium uocat ac stupefactus numine pressit\nExcepitque manu dextramque amplexus inhaesit.","prev":{"citation":"Cento 47-90","label":"Lines 47-90","url":"https://interlinea.aeterna-institute.org/library/latin/proba/cento/47","api":"https://interlinea.aeterna-institute.org/api/v1/library/latin/proba/cento/47"},"next":{"citation":"Cento 136-185","label":"Lines 136-185","url":"https://interlinea.aeterna-institute.org/library/latin/proba/cento/136","api":"https://interlinea.aeterna-institute.org/api/v1/library/latin/proba/cento/136"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}