{"kind":"section","lang":"la","language":"Latin","title":"Hymnus tabaci 10","citation":"Raphael Thorius, Hymnus tabaci 10","ref":"10","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/10","api":"https://interlinea.aeterna-institute.org/api/v1/library/latin/raphael-thorius/hymnus-tabaci/10","markdown":"https://interlinea.aeterna-institute.org/library/latin/raphael-thorius/hymnus-tabaci/10.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":157,"text":"Accelerant, renuuntque mori, venatque supremo\nSanguine manantes, animae spiracula claudunt.\nVtque propinquabant, altis se prodit opacum\nStipitibus nemus, & folijs spectabile vastis.\nEuge! meis, clamat, cognatam vitibus herbam\nAgnosco, munusque Deûm. sed plura volenti\nSurda manus, latas tenero de caudice frondes\nCarpit, & ignoto latrantia viscera succo\nDemulcet; viridis stillat sub dentibus humor.\nNon tamen oblatas Sileni provida virtus\nPraecipiti vorat ore dapes, sed cautior usu\nHaeret ab exemplo documenta abstemius optans.\nNec mora: quis patulis lateat sub frondibus error,\nEventus docuit: totis (mirabile) castris\nEvomitur, caditurque velut cum gurgite pleno\nIngruit admissi miranda potentia Bacchi;\nVolvitur in gyrum tellus, coelumque videtur\nNubibus adductis surgenti occurrere terrae:\nTum sopor obrepit, somnique in victa cupido\nGermanam dubia praesagit imagine mortem;\nCapripedes mediis diffusos stertere arenis\nCernere erat, disiecta solo defeßa furentum\nMembra Mimallonidum devota jacere sepulero.\nMox ubi discusso longi languore veterni\nPlenior ex adytis in singula membra recurrit\nSpiritus, amissae redierunt corpore vires\nSurgere tunc alacres, pedibusque insistere firmis,","prev":{"citation":"Hymnus tabaci 9","label":"RAPHAE","url":"https://interlinea.aeterna-institute.org/library/latin/raphael-thorius/hymnus-tabaci/9","api":"https://interlinea.aeterna-institute.org/api/v1/library/latin/raphael-thorius/hymnus-tabaci/9"},"next":{"citation":"Hymnus tabaci 11","label":"RAPHAE","url":"https://interlinea.aeterna-institute.org/library/latin/raphael-thorius/hymnus-tabaci/11","api":"https://interlinea.aeterna-institute.org/api/v1/library/latin/raphael-thorius/hymnus-tabaci/11"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}