{"kind":"section","lang":"la","language":"Latin","title":"Hymnus tabaci 13","citation":"Raphael Thorius, Hymnus tabaci 13","ref":"13","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/13","api":"https://interlinea.aeterna-institute.org/api/v1/library/latin/raphael-thorius/hymnus-tabaci/13","markdown":"https://interlinea.aeterna-institute.org/library/latin/raphael-thorius/hymnus-tabaci/13.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":161,"text":"Vt solet à noti foecundo flumine Bacchi\nSerpere paulatim non intellecta voluptas.\nOra madent: non salsa sitis, non vexat acerba\nEsuries, vomitusve: levi vertigine tantum\nCrura vacillare, & supremam udescere frontem\nPercipit, illaesus sed & haec vanescere gaudet.\nTum vacuus densa Paeti porrectus in umbra,\nOmnigenum ut patuit faecunda scientia rerum,\nDulcibus absumit lentas sermonibus horas.\nExplicat ingentes opulentae mentis acervos,\nLudenti & similis Naturae arcana recludit,\nImplicitos memorat sphaeris caelestibus orbes,\nCompagemque hominis, terrae & miracula pandit,\nAddit & oraclis docti libamina fumi.\nFumantem sequitur circum diffusa juventus\nIpsa novis operata tubis, fumoque fragrantis\nAt rudis ore vomit naso reddenda patente\nNubila cum multa tussi lacrymisque jocosis,\nRidicula, appressis animam quae claudere labris\nNescit, perque cavas iterum depellere nares;\nDocta sed exemplo grandaevum aequare magistrum\nEfflando satagit, repletque vaporibus auras;\nDumque hilares animis laeta vitulantur. in herba,\nEcce venit fessis longum expectata ministris\nAnnona, & multo ferventia dolia vino.\nClamores geminant, versisque ad cantica cannis\nGaudia agunt, epulisque favent, multumque vocatis\nlumentis, reducique senis gratantur Asello:","prev":{"citation":"Hymnus tabaci 12","label":"RAPHAE","url":"https://interlinea.aeterna-institute.org/library/latin/raphael-thorius/hymnus-tabaci/12","api":"https://interlinea.aeterna-institute.org/api/v1/library/latin/raphael-thorius/hymnus-tabaci/12"},"next":{"citation":"Hymnus tabaci 14","label":"RAPHAE","url":"https://interlinea.aeterna-institute.org/library/latin/raphael-thorius/hymnus-tabaci/14","api":"https://interlinea.aeterna-institute.org/api/v1/library/latin/raphael-thorius/hymnus-tabaci/14"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}