{"kind":"section","lang":"la","language":"Latin","title":"Hymnus tabaci 16","citation":"Raphael Thorius, Hymnus tabaci 16","ref":"16","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/16","api":"https://interlinea.aeterna-institute.org/api/v1/library/latin/raphael-thorius/hymnus-tabaci/16","markdown":"https://interlinea.aeterna-institute.org/library/latin/raphael-thorius/hymnus-tabaci/16.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":164,"text":"Libertate dolent servas solatur at illos\nIndulgentis heri condita lepore potestas,\nEt victoris amor: simili discrimine victos\nVictoresque videt bellis utrinque remissis\nVna dies miscere epulas, Bacchumque ciere,\nEt simul alternis fumum potare cicutis;\nMirantur bona nata domi, nec nota queruntur,\nEt nebulas animi jucundis nubibus arcent.\nAtque haec prima fuit mortales stirpis in usus\nNotitia, haec late noti cunabula fumi.\nIam quae vis lateat plantae, quibus apta bibendo\nCorporibus, quibus & pugnet contraria morbis,\nMusa refer, geniumque novo concede labori.\nIn primis non una subest natura stupendo\nIn folio: adversis dives virtutibus omnem\nExuperare fidem gaudet, stirpesque beatas\nProvocat: hellebori robur, rheabarbara duras\nSolvere nata alvos, facientem gaudia vitem,\nBalsama vulneribus laudata, fabamque suillam,\nNepenthesque animi mulsum, gravidumque papaver.\nMagna Dei virtus, quae tot miracula rerum\nSeminis exigui tantillo cortice clausit\nQuod licet haud superet cineris, vel laevis arenae\nFallentis digitum & numerantia lumina, molem,\nMox dabit ingentem frondoso tegmine sylvam,\nEt certa in dubijs promet medicamina morbis.\nQuod si quis tantas rimari indagine causas","prev":{"citation":"Hymnus tabaci 15","label":"RAPHAE","url":"https://interlinea.aeterna-institute.org/library/latin/raphael-thorius/hymnus-tabaci/15","api":"https://interlinea.aeterna-institute.org/api/v1/library/latin/raphael-thorius/hymnus-tabaci/15"},"next":{"citation":"Hymnus tabaci 17","label":"RAPHAE","url":"https://interlinea.aeterna-institute.org/library/latin/raphael-thorius/hymnus-tabaci/17","api":"https://interlinea.aeterna-institute.org/api/v1/library/latin/raphael-thorius/hymnus-tabaci/17"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}