{"kind":"section","lang":"la","language":"Latin","title":"Hymnus tabaci 23","citation":"Raphael Thorius, Hymnus tabaci 23","ref":"23","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/23","api":"https://interlinea.aeterna-institute.org/api/v1/library/latin/raphael-thorius/hymnus-tabaci/23","markdown":"https://interlinea.aeterna-institute.org/library/latin/raphael-thorius/hymnus-tabaci/23.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":153,"text":"Indigenis statuit dominos, nec morem tyranno\nOptavit metui, metuit non ipse timentes;\nLenibus alloquijs, & majestate remißam\nPartus amor populi, facilis clementia mores\nErudijt, glebamque jugo parere suasit.\nTerra feris infamis erat, Lyncesque, lupique,\nTigres & celeres pardi, mistique Leones,\nImpune insidias pecorique virisque parabant,\nTollere nec cladem intentis in mutua bella\nCura fuit, maior sed erat meliorque voluptas\nFinitimos flammis vexare & caedibus agros,\nEt coctos calidis hostes apponere mensis.\nNon tulit immanem ingluviem, qui temperat aestus,\nSanguinis inque siti pacis suffundit amorem\nVastitiem lustrare cupit, regesque cruentos\nVisere, & ingenuas crassis dare mentibus artes.\nAssumit numero è magno, quos indolis esse\nSciverat urbanae, calicum sed largior usus\nVitaque liberior, nervisque inimica libido\nFecerat effaetos, at nobilis aura Tabaci\nCompositusque labor, caelique nitentior haustus\nSensim reddiderat reparatis viribus aegros.\nAmphoriam, Balanumque legit, comemque Neandrum,\nIucundos comites, totidem quibus addit amoena\nFronte viros, luscum Pelian, geniique sagacis\nIdmona, caerulei ridendum tubere naji,\nPauperis & barbae metuentem scommata Trullum.","prev":{"citation":"Hymnus tabaci 22-2","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/22-2","api":"https://interlinea.aeterna-institute.org/api/v1/library/latin/raphael-thorius/hymnus-tabaci/22-2"},"next":{"citation":"Hymnus tabaci 24","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/24","api":"https://interlinea.aeterna-institute.org/api/v1/library/latin/raphael-thorius/hymnus-tabaci/24"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}