{"kind":"section","lang":"la","language":"Latin","title":"Hymnus tabaci 26","citation":"Raphael Thorius, Hymnus tabaci 26","ref":"26","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/26","api":"https://interlinea.aeterna-institute.org/api/v1/library/latin/raphael-thorius/hymnus-tabaci/26","markdown":"https://interlinea.aeterna-institute.org/library/latin/raphael-thorius/hymnus-tabaci/26.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":156,"text":"Ille nihil clarum; obscuros modo gutture mittit\nGrunnitus, torvumque tuens, non sponte monenti\nObsequitur, pavidosque jubet parere clientes:\nTumque abit annona infelix, meliore parata\nSuccedunt verubus jucunda obsonia mundis\nCervorumque suumque tori, leporesque anatesque\nVenantum, & quicquid dederat labor.\nAdvolvuntur humi (nec enim conjungere mensas\nHora dabat) Bacchus primum vetulusque magister,\nTertius Haematoes; nullo mox ordine seni\nProcumbunt comites, tum picti terga sodales.\nFata juvent; nunquam dextras junxisse fideles\nPaeniteat (rex Liber ait) foelicia sint haec\nFoederis incoepti primordia: ponite amici\nRitus immundos, facilique assuescite vitae:\nTuque adeo, subitos aditus, nec libera, frater,\nCondemna alloquia ingenui firmamen amoris;\nProderit hoc olim hospitium, nec vestra juventus\nVtile subsidium vitae didicisse dolebit:\nHoc tu pignus habe, quo nullum sanctius optes.\nDixit, & undantem vino cratera recenti\nImpiger exhaurit, secto quod palmite nuper\nArboris aëreae repetito effluxerat ictu,\nVtribus & plenis stabat prope: suscipit ingens\nBellua, & epoto miserorum sanguine, tetram\nNon prius aspectum nectar deturbat in alvum,\nEmittitque olidae ructamina cruda popinae.","prev":{"citation":"Hymnus tabaci 25-2","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/25-2","api":"https://interlinea.aeterna-institute.org/api/v1/library/latin/raphael-thorius/hymnus-tabaci/25-2"},"next":{"citation":"Hymnus tabaci 27","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/27","api":"https://interlinea.aeterna-institute.org/api/v1/library/latin/raphael-thorius/hymnus-tabaci/27"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}