{"kind":"section","lang":"la","language":"Latin","title":"Hymnus tabaci 29","citation":"Raphael Thorius, Hymnus tabaci 29","ref":"29","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/29","api":"https://interlinea.aeterna-institute.org/api/v1/library/latin/raphael-thorius/hymnus-tabaci/29","markdown":"https://interlinea.aeterna-institute.org/library/latin/raphael-thorius/hymnus-tabaci/29.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":231,"text":"Libertas miseris, pedibus quos fune ligatis\nAegrotos stabulis in foedo stramine vidi.\nAnnuit Haemathoens: solvuntur vincula claudis,\nProrepunt geminis nixi, sua quique gerentes\nOre mala, & lucem veriti tetigisse supremam,\nVultibus obscoenis laetâ ductantur in aulâ.\nNon tenuit lacrymas vetulus Pater. Eia, sodales\nVivitè, ait, vitam meliori at ducite fato:\nNam licet, & dabitur: latet isto condita buxo\nVestra salus, modo sit servari certa voluntas.\nTu miserande Senex, muriam pro sanguine venis\nQui generas, cui crura labant luctante podagrâ,\nPurpurei stillant, hebetesque arctantur ocelli,\nCaecus eris, si spernis opem, sed ab arte medelam\nSufficiam: & tumidis albo suffimine buccis\nIn pileum nebulam inspirat, vultusque seniles\nProtinus includit junctis ad tempora limbis.\nExcipit ore senex mordentes lumina fumos,\nEt patitur jussus spe consolante dolorem,\nExprimit imbrem oculis, videt acrius omnia circum,\nPlenius admissa detersis luce fenestris.\nAtque potest adeo salebrosa in nare Magistri\nEminus extantes oculo numerare pyropos:\nNamque rogatus uti in naso quae cerneret, & quot\nDiceret, ostendit digitos, &, fraga tot, inquit,\nAspicio in nostris nascuntur qualia sylvis.\nflia concussit Vetulus, risere sodales.\nDignus es articulis sine nodo: age sugito, dixit,\nClaude labrum, & laxis expira naribus auram:\nSugit, & expirat; sed porro injussus, ut antrum\nIn gyros volvi, & turbari ructibus alvum\nSensit, humi recubans confertim cruda remittit\nFrusta, & multiplices, quas ante voraverat, offas.\nEn podagrae exitium: sic fonte revellitur ipso\nSuccus edax teneros rodens sine dentibus artus.\nHoc bis agas, quum luna latet, cumque orbe recrevit","prev":{"citation":"Hymnus tabaci 28","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/28","api":"https://interlinea.aeterna-institute.org/api/v1/library/latin/raphael-thorius/hymnus-tabaci/28"},"next":{"citation":"Hymnus tabaci 30","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/30","api":"https://interlinea.aeterna-institute.org/api/v1/library/latin/raphael-thorius/hymnus-tabaci/30"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}