{"kind":"section","lang":"la","language":"Latin","title":"Hymnus tabaci 30","citation":"Raphael Thorius, Hymnus tabaci 30","ref":"30","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/30","api":"https://interlinea.aeterna-institute.org/api/v1/library/latin/raphael-thorius/hymnus-tabaci/30","markdown":"https://interlinea.aeterna-institute.org/library/latin/raphael-thorius/hymnus-tabaci/30.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":110,"text":"Tum latebris turgent succi, tum mobilis humor\nPost laeves patinas, & prandia pinguis omasi.\nSic ubi cisternam illuvie, primamque cloacam\nTerserit, humores ablatis faecibus ibunt\nPurius, articulis blanda, & sine sorditie acri\nNutrimenta fluent, quo nec faecunda malignis\nRelliquijs acidi pungentur acumine nitri,\nTorta nec in duram concrescent vincula cretam:\nTum levitate pedum Satyris certabis, & ipsas\nSponte tua poteris saltu ductare choreas.\nQuod si pauca tamen salsae vestigia labis\nExuperant, hausti blanda torpedine fumi\nVanescent, nec hebes sensus, velut ante, dolebit.\nHac ope non podagrae tantum cruciamina cessant,\nSed porrò coli rabies, sed volvulus atrox,\nGutturis & foedae tollens discrimina sedis,\nEt capitis clavus, & sibilus auris adurens\nMitescunt subito, nec post injussa recurrunt,","prev":{"citation":"Hymnus tabaci 29","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/29","api":"https://interlinea.aeterna-institute.org/api/v1/library/latin/raphael-thorius/hymnus-tabaci/29"},"next":{"citation":"Hymnus tabaci 31","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/31","api":"https://interlinea.aeterna-institute.org/api/v1/library/latin/raphael-thorius/hymnus-tabaci/31"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}