{"kind":"section","lang":"la","language":"Latin","title":"Hymnus tabaci 32","citation":"Raphael Thorius, Hymnus tabaci 32","ref":"32","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/32","api":"https://interlinea.aeterna-institute.org/api/v1/library/latin/raphael-thorius/hymnus-tabaci/32","markdown":"https://interlinea.aeterna-institute.org/library/latin/raphael-thorius/hymnus-tabaci/32.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":187,"text":"DE PA\nLIB. II.\nQuas mala conceptae salsuginis aura creavit.\nLabentes pluviae sublimi è fornice tecti\nIn teneros folles, quibus insita flamma movendo\nVivit, & in numerum flatu modulante, fovetur,\nDensatae in media pendent regione, forasque\nAnte, levis quam sit membrana arrosa, feruntur.\nQuid referam tumidas fauces, laqueumque latentem,\nHellucum, & subitâ dubios vertigine gressus,\nClangosasque brevi minitantia flumina nares?\nOmnia mulcentur fumo, si provida cura\nMaturat, seras nec opem producit in horas.\nSunt, quibus occultis mordax contagio membris\nOffecit, seu spurcities nitrosa canales\nRaserit urinae, vel apertum faecibus anum:\nHinc quoque luctifico requiem sperate dolori\nQui matulae ingemitis, qui clavos inter acutos\nHorrida Caucasei depingitis ora Promethei.\nNon ego vaticinor, Parnassi aut somnia fingo;\nNota loquor, quaeque ipse prius crudelia sensi,\nQuam facies Paeti mirandaque nota foret vis:\nNamque (fatebor enim) luxu transacta juventus\nCum Baccho, Satyris, & suavi isto comitatu,\nHic illic vetulo rimas in corpore fecit,\nSubjecitque malis, quae magna est nosse voluptas,\nSanasse utilior, nostroque probata periclo\nCertius in populi juvat usurpare salutem:\nSed quia par cura est tristes expellere morbos\nEt validos servare habitus, quae cautio sanis, Discite, quisve modus, nec enim omnibus omnia prosunt.","prev":{"citation":"Hymnus tabaci 31","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/31","api":"https://interlinea.aeterna-institute.org/api/v1/library/latin/raphael-thorius/hymnus-tabaci/31"},"next":{"citation":"Hymnus tabaci 33","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/33","api":"https://interlinea.aeterna-institute.org/api/v1/library/latin/raphael-thorius/hymnus-tabaci/33"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}