{"kind":"section","lang":"la","language":"Latin","title":"Hymnus tabaci 34","citation":"Raphael Thorius, Hymnus tabaci 34","ref":"34","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/34","api":"https://interlinea.aeterna-institute.org/api/v1/library/latin/raphael-thorius/hymnus-tabaci/34","markdown":"https://interlinea.aeterna-institute.org/library/latin/raphael-thorius/hymnus-tabaci/34.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":223,"text":"Haud secus ac nebulae hyberni caligine solis.\nCompositi validis biberint si largius aequo,\nOccupat ignavos torpor, defessa quietem\nMembra petunt, nervis velut ex aetate solutis,\nMane tremunt, altaque obeunt in luce soporem.\nQuod si praeterea roseus color inficit ora,\nEt subeunt tusses, & densus anhelitus, illum\nEjurare tubos jubeo, carosque sodales,\nNe redimat nocuos vitae discrimine lusus.\nIlli pulmo flagrat, putrive uligine turgens\nFebrim corde fovet, lentoque absolvitur igne.\nSed si tantus amor fumi, nec tendere contra\nVota libet, caeco ratio sed cedit amori,\nBechion arentem sumat, fumumque capessat\nNon metus hinc fuerit, sed spes non vana salutis:\nNec moderatus enim accendit calor, at levis aura\nVlcera desiccat, saniemque e pectore ducit.\nDenique si qua vehit tectam causa abdita tabem,\nSeu mala per totum diffusa injuria corpus,\nSeu cita febris erit, laesi vel visceris aestus,\nAh tibi ne tanti sit perniciosa voluptas.\nDeclina illecebras, & quamvis parcere durum,\nParce tamen, certae & caveas auctaria cladis.\nEst etiam quandoque, ut, qua data porta, subinde\nErumpat sus deque cruor, lethumque minetur,\nEt vomitis ruat, & laxis fluat alvus habenis:\nQuicquid contigerit, feralia pocula mitte,\nNec libeat nocuas immittere faucibus escas: Sanguinis hinc fluvij crescunt, vomitusque ferocit,\nVitaque disiectis tandem cum faecibus exit.\nIudicio hic sistor rationis tollere visus\nQuod posui: nam si Paeti gravis herba soporat,\nEt sopor excrementa tenet, damnatur inique\nQuod juvat & laudem meruit, bene praemonet, inquam,","prev":{"citation":"Hymnus tabaci 33-2","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/33-2","api":"https://interlinea.aeterna-institute.org/api/v1/library/latin/raphael-thorius/hymnus-tabaci/33-2"},"next":{"citation":"Hymnus tabaci 35","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/35","api":"https://interlinea.aeterna-institute.org/api/v1/library/latin/raphael-thorius/hymnus-tabaci/35"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}