{"kind":"section","lang":"la","language":"Latin","title":"Hymnus tabaci 38","citation":"Raphael Thorius, Hymnus tabaci 38","ref":"38","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/38","api":"https://interlinea.aeterna-institute.org/api/v1/library/latin/raphael-thorius/hymnus-tabaci/38","markdown":"https://interlinea.aeterna-institute.org/library/latin/raphael-thorius/hymnus-tabaci/38.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":163,"text":"Immortalis enim cum sit mens, ortaque coelo\nPortio, corporeis non est obnoxia damnis.\nActio recta quidem, si laeditur instrumentum,\nLaeditur ad tempus, causâ durante, sed ipsa\nMens intacta manet, quanquam, ceu nubibus atris\nCircumfusa latet, radiosque occultat inertes\nNon aliter Phoebi quam lucida tela Dianae\nIntercepta globo, vel tegmine nubis opacae,\nTempore non longo nostris tolluntur ocellis;\nNec minus ipse tamen sincero candidus orbe\nArdet, & innumeris lucem communicat astris:\nSic animo nulla est, animi nisi crimine labes:\nDesidia, & luxus, levis inconstantia, & ira\nIngenium obtundunt, lumen rationis inumbrant,\nPermiscentque notas tabulis, & nomina delent.\nQuilibet id meminit quod amat, crebroque revolvit.\nDa mihi de multis fumi potoribus unum\nGeditor, aut plenae cui sint oblita crumenae\nScrinia, desponsae vel notum limen amicae,\nEt dabo de fumi multis osoribus octo,\nAut plures etiam, proprium cognomen, & acta\nHesterna, & patriae oblitos elementa loquelae.\nScilicet aut nocuum virus, vel pestifer ignis,\nAut morbus subito sumens à verbere nomen,\nAut nimium palpata Venus vergente senecta\nLaeserat officium cerebri, nec congener aethrae","prev":{"citation":"Hymnus tabaci 37","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/37","api":"https://interlinea.aeterna-institute.org/api/v1/library/latin/raphael-thorius/hymnus-tabaci/37"},"next":{"citation":"Hymnus tabaci 39","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/39","api":"https://interlinea.aeterna-institute.org/api/v1/library/latin/raphael-thorius/hymnus-tabaci/39"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}