{"kind":"section","lang":"la","language":"Latin","title":"Hymnus tabaci 41","citation":"Raphael Thorius, Hymnus tabaci 41","ref":"41","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/41","api":"https://interlinea.aeterna-institute.org/api/v1/library/latin/raphael-thorius/hymnus-tabaci/41","markdown":"https://interlinea.aeterna-institute.org/library/latin/raphael-thorius/hymnus-tabaci/41.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":167,"text":"Si quando oppressus pulmo sublatus anhelat,\nDeprimit, inque suas cogit descendere sedes\nOcyus, incumbens binûm quam centurionum\nPondus, & impositi densissima sarcina plumbi.\nPorrò nulla seni, si vitea pocula demas.\nCommodiora dedit mater bellaria tellus,\nSeu servanda venit naturae annona fovendo\nHumorem ingenitum, suavem fundendo vaporem\nArenti cerebro, pellendi aut sensibus hostes:\nNamque aciem lippis acuit: cui stiria pendens\nNasum hebetat, reddit siccata nare sagacem,\nDissolvitque graves ventosa ex aure susurros,\nIn mentem, ut melius sapientum dicta recondat,\nColloquijsque diem morosaque taedia fallat.\nQuod si quis damnosa luens delicta juventae,\nNocte erucem scapulis gestat, somnumque recusat,\nHic quoque solamen quaerat, requiemque labori;\nNon tantum sopor in venas obrepet amicus,\nVnde dolor cedat, sed, ne nox longa putetur,\nSomnia pulcra dabit, rerum & spectacula viva\nOfferet ante oculos. non qualia monstra figurat\nTorrida, bilis atrox, faba, lentes, caepa, faselus:\nAllia, & altercum fatuum, manicumque solanum,\nSi quis edit, medio in somno spectare putabit\nHorrendas facies, confusaque saecla animantum,\nQuae nec sunt, nec erunt, harpyas aequore nantes,\nAëre Centauros, fißâ tellure Draconum","prev":{"citation":"Hymnus tabaci 40","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/40","api":"https://interlinea.aeterna-institute.org/api/v1/library/latin/raphael-thorius/hymnus-tabaci/40"},"next":{"citation":"Hymnus tabaci 42","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/42","api":"https://interlinea.aeterna-institute.org/api/v1/library/latin/raphael-thorius/hymnus-tabaci/42"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}