{"kind":"section","lang":"la","language":"Latin","title":"Hymnus tabaci 43","citation":"Raphael Thorius, Hymnus tabaci 43","ref":"43","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/43","api":"https://interlinea.aeterna-institute.org/api/v1/library/latin/raphael-thorius/hymnus-tabaci/43","markdown":"https://interlinea.aeterna-institute.org/library/latin/raphael-thorius/hymnus-tabaci/43.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":176,"text":"THORI\nRIVII\nNon lethaeus enim est opij sopor, omnia ferreis\nInteriora ligans, immota ut lege, catenis.\nNon etiam ambiguae turbatrix umbra cicutae\nSensibus injiciens illusis frivola vincla,\nQuae nec mota tenent objectis membra figuris,\nNec penitus vigilare sinunt: sic altera Baucis\nEt Philemon teneras caenati forte cicutas\nEffossas in agro, quas falsi ab imagine formae\nCrediderant siser esse, aut notae Baucidis herbam,\nPostquam fessa humili posuissent membra grabato,\nNec vigiles, nec adhuc somni sub pondere victi,\nExiliere toro; prior haec, mox ille, vagatique\nAtria per tuguri brumali nocte, rigentes,\nAttoniti pariter, deliria mira stupentes,\nLivida de trabibus retulerunt membra grabato:\nAt sopitus homo claro spiramine Paeti\nGaudia pacificae noctis transacta retractat,\nEt vigil ad solitum redit aequâ mente laborem,\nSi modò laudatum fuerit, non vile, nec arte\nFictitiumque dolis, namque omni electa Tabaco\nNon eadem est bonitas: generosum ab origine prima\nAsperum erit, densum folio, pullumque tuendo\nJucundum longè & late diffundet odorem\nPermistum viola, aut aura radicis Etruscae;\nIncensum referet gustanti rite palato\nAßyrium Asphalton, cauti vel Castoris orchin:\nQuod folio tenue est, Autumni frondibus aequum","prev":{"citation":"Hymnus tabaci 42","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/42","api":"https://interlinea.aeterna-institute.org/api/v1/library/latin/raphael-thorius/hymnus-tabaci/42"},"next":{"citation":"Hymnus tabaci 44","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/44","api":"https://interlinea.aeterna-institute.org/api/v1/library/latin/raphael-thorius/hymnus-tabaci/44"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}