{"kind":"section","lang":"la","language":"Latin","title":"Hymnus tabaci 44","citation":"Raphael Thorius, Hymnus tabaci 44","ref":"44","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/44","api":"https://interlinea.aeterna-institute.org/api/v1/library/latin/raphael-thorius/hymnus-tabaci/44","markdown":"https://interlinea.aeterna-institute.org/library/latin/raphael-thorius/hymnus-tabaci/44.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":170,"text":"Quale in Virginia, & Bormudae nascitur arvis,\nAbijce, & aurigis foenum, nautisque relinque:\nPungit enim tunicas oculi, cerebrique voluera;\nQui bibet, ille graves ad opus mirabitur armos.\nPandiculator erit, malas diducet hiantes,\nEt, nisi acuta fames stimulat, projectus ad ignem\nGaudebit seram stertendo adducere noctem.\nAnte alios fugite ô Musarum sancta propago,\nQui veterum è chartis Sophiae defossa metalla\nEruitis vigiles, deprensum per sua signa\nProfligate scelus mangonum, & tradite flammis,\nEst qui delicias alieno ex orbe petitas\nCaptat adulterio, dum, quam Scytha fuste peremit,\nMiscet odoratae tabum ferale capellae.\nStillam alius marathri jungit, vel pinguis anisi,\nChalcanthive notam, quae linguae affusa saporem\nExhibet, ut Lybicae mixta melligine cannae;\nOmnia damnose, ne dicam molliter: artem\nQui Naturae adhibet, matris nisi consulat ora,\nTurbat opus, non addit opem: quod si tamen unquam\nLascivire libet, laudique adjungere laudem,\nSumite lignum aloes, cujus levis assula pleno\nFixa tubo totum fragrans perfundet acervum,\nEt cerebri ventres grato recreabit odore.\nSed neque congestis dapibus conjungite fumos:\nInde coqui turbatur opus, si clausa superne\nOstia pulsantur, tum semielixa deorsum","prev":{"citation":"Hymnus tabaci 43","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/43","api":"https://interlinea.aeterna-institute.org/api/v1/library/latin/raphael-thorius/hymnus-tabaci/43"},"next":{"citation":"Hymnus tabaci 45","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/45","api":"https://interlinea.aeterna-institute.org/api/v1/library/latin/raphael-thorius/hymnus-tabaci/45"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}