{"kind":"section","lang":"la","language":"Latin","title":"Hymnus tabaci 46","citation":"Raphael Thorius, Hymnus tabaci 46","ref":"46","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/46","api":"https://interlinea.aeterna-institute.org/api/v1/library/latin/raphael-thorius/hymnus-tabaci/46","markdown":"https://interlinea.aeterna-institute.org/library/latin/raphael-thorius/hymnus-tabaci/46.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":178,"text":"Summa Tabacophilis culturae arcana canemus.\nPrincipio, ut messis respondeat ampla labori,\nSume medullosum generoso è germine semen,\nCui folium oblongum, crassum, nulloque pedunclo\nInseritur trunco, sed ab ipso stipite surgit.\nProxima cura loci; tam strenua planta recusat\nSegne solum; felix animoso crescit in agro\nQualem vitis amat: colles, objectaque soli\nArva legas, ubi terra levis, non marga ligoni\nObvia, non argilla tenax, non obsita musco\nTesqua, nec impresso flentes sub vomere glebae.\nNe tamen egregiae quantum vis indolis agrum\nBis sere, si plenae ducit te gloria messis.\nPrima rapit foetura animae quodcunque virile est\nEffoetaque uterum delumbem in matre relinquit.\nVerte solum, sedesque novas adscribe quotannis\nHospiti inexpleto, fessis gratissima sulcis\nDum permissa quies pingui laetamine robur\nSuppleat, exhausta & genium per viscera fundat.\nNactus agrum urge operas; ne sit solertior alter\nOrdine descriptis spatijs pertundere terram,\nTernaque vel plura in parvum dare grana foramen,\nDivisa aequali ut vegetabilis aura tenore\nInserat aequalem folia in ventura vigorem.\nQuod si caßum aliquod fallit, vel cedit in escam\nMuribus aut rostro fodientibus omnia talpis,\nSpes de relliquijs superet; si sospite turba","prev":{"citation":"Hymnus tabaci 45","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/45","api":"https://interlinea.aeterna-institute.org/api/v1/library/latin/raphael-thorius/hymnus-tabaci/45"},"next":{"citation":"Hymnus tabaci 47","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/47","api":"https://interlinea.aeterna-institute.org/api/v1/library/latin/raphael-thorius/hymnus-tabaci/47"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}