{"kind":"section","lang":"la","language":"Latin","title":"Hymnus tabaci 47","citation":"Raphael Thorius, Hymnus tabaci 47","ref":"47","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/47","api":"https://interlinea.aeterna-institute.org/api/v1/library/latin/raphael-thorius/hymnus-tabaci/47","markdown":"https://interlinea.aeterna-institute.org/library/latin/raphael-thorius/hymnus-tabaci/47.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":178,"text":"Densior ortus obest folijs, tabesque timetur,\nVideris ut crebram tellure exurgere gentem,\nThrax esto, patriae leges imitare severas,\nImminuas numerum, multisque è fratribus unum\nLinque solo, vacua melius quo crescat in arena,\nAttrahat & plenum nutricis ab ubere succum:\nMox ubi pingue solum, longique in tempore soles\nLuxuriem folijs dederint, in caudice robur,\nTempus erit terrae vicinas stringere frondes,\nMajor ut in summo claudatur cortice virtus,\nEt ferat à justo bonitatis judice palmam.\nAt ne praecipites messem; ut nigrescere semen\nCoeperit in calice, & folium mutare colorem,\nArma para, & cultros; vindemia nobilis instat,\nEt merces operae: luces optate serenas\nPaeticolae, nec enim folio minus officit imber,\nQuam September obest maturis humidus uvis:\nTunc mete: dimidia est tibi jam decursa laboris\nMeta; quod hinc restat, curâ haud leviore gerendum: Frustra etenim studium omne fuit, generisque solique\nGloria, ni summo veniat spectabilis actu.\nHic duo sollicito tibi sunt curanda labore:\nAbsumendus aquae, genitor putredinis, humor,\nNe simus è folio fiat, mox spiritus & vis\nIgnea, quae pingui velut abdita dormit olivo,\nExcutienda, suos & deducenda per artus.\nErgo, ne aetheream Sol fervidus hauriat auram","prev":{"citation":"Hymnus tabaci 46","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/46","api":"https://interlinea.aeterna-institute.org/api/v1/library/latin/raphael-thorius/hymnus-tabaci/46"},"next":{"citation":"Hymnus tabaci 48","label":"LIBER SECVNDVS","url":"https://interlinea.aeterna-institute.org/library/latin/raphael-thorius/hymnus-tabaci/48","api":"https://interlinea.aeterna-institute.org/api/v1/library/latin/raphael-thorius/hymnus-tabaci/48"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}