{"kind":"section","lang":"la","language":"Latin","title":"Hymnus tabaci 5","citation":"Raphael Thorius, Hymnus tabaci 5","ref":"5","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/5","api":"https://interlinea.aeterna-institute.org/api/v1/library/latin/raphael-thorius/hymnus-tabaci/5","markdown":"https://interlinea.aeterna-institute.org/library/latin/raphael-thorius/hymnus-tabaci/5.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":false,"words":173,"text":"Nunquam equidem speraveram tam dextrum in illo poematio Apollinem, ut talibus palatis placeret, nec ut sedecim annorum aetatem ferret foetus in auras temere proiectus, non consilio conceptus, non cura formatus. Quando tamen bono suo fato tam amicos invenit susceptores, non fraudabo illum sui genij beneficio, nec vos vestra expectatione. Immo vero liberalius agam cum liberalibus, adjuncto fratre juniore paulo curiosius composito. Vtrumque vestro omnium arbitrio expono, & permitto. Edite in lucem, quando putatis placere posse. sed editum fovete: patri, ut coepistis, favete, & contra Catonum censuram defendite ludentem inter pueros senem. Quod autem rem aliis amicis negatam vobis concedo, rationes fuerunt locus & personae. Crimen hîc est inter nos esse Poëtam, nec sani cerebri habetur qui post primam lanuginem in Parnasso somniat. Vobis istic alia est sententia, quibus placent Musae etiam cum sua canitie. qui delirij accersitum Sophoclem lecta eius tragoediâ absolvitis. Porro in hoc litterarum genere Reges cum sitis, merito Iudicum partes sustinetis, ut nemo ausit, vestris arbitriis derogare. Atque hoc me in periculosa alea consolatur, quod, quem semel vestro calculo approbaveritis, nemo audebit condemnare.","prev":{"citation":"Hymnus tabaci 4","label":"4","url":"https://interlinea.aeterna-institute.org/library/latin/raphael-thorius/hymnus-tabaci/4","api":"https://interlinea.aeterna-institute.org/api/v1/library/latin/raphael-thorius/hymnus-tabaci/4"},"next":{"citation":"Hymnus tabaci 6","label":"6","url":"https://interlinea.aeterna-institute.org/library/latin/raphael-thorius/hymnus-tabaci/6","api":"https://interlinea.aeterna-institute.org/api/v1/library/latin/raphael-thorius/hymnus-tabaci/6"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}