{"kind":"section","lang":"la","language":"Latin","title":"Hymnus tabaci 57","citation":"Raphael Thorius, Hymnus tabaci 57","ref":"57","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/57","api":"https://interlinea.aeterna-institute.org/api/v1/library/latin/raphael-thorius/hymnus-tabaci/57","markdown":"https://interlinea.aeterna-institute.org/library/latin/raphael-thorius/hymnus-tabaci/57.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":147,"text":"Ejusdem\nHYEMS.\nMnicolae vates, clausis quos aedibus algor\nMisit in exilium, duris & rebus egestas\nSedibus ignotis locupletum ad limina vilem\nMendicare jubet gemebundo carmine victum,\nIncolumes si qui tanta de clade supersunt,\nPectore si quis adhuc niveo calor insitus haeret,\nDicite jejunum peregrini carmen olores.\nEt me tangit hyems; noster quoque friget Apollo;\nForsitan & plectro frustra ostia celsa potentum\nPulsaret, miseras supplens nisi filius artes\nArte minus sterili vacuos sarciret hiatus,\nEt, radiante pyra jusso fervere lebeti,\nVbere perfusos apponeret ungine caules:\nIlle Patris citharam obtendens, dum bruma salubres\nPublicat inducias, nostris & bella crumenis,\nAnte focum impellit gelidos effundere versus.\nFlat Boreas, albent montes, stant flumina ripis,\nFit nive nigra dies; Sol ipse in nubibus alget\nFestinans cubitum, vel saltem algere videtur,\nCornibus illustrat dum Luna micantibus Orbem:\nBarba gelu concreta sonat; flent lumina vento;\nInterea ore strepunt dentes, rigor efferus ungues\nLancinat, & prohibet plenas emungere nares.","prev":{"citation":"Hymnus tabaci 56-2","label":"IN EIVSDEM","url":"https://interlinea.aeterna-institute.org/library/latin/raphael-thorius/hymnus-tabaci/56-2","api":"https://interlinea.aeterna-institute.org/api/v1/library/latin/raphael-thorius/hymnus-tabaci/56-2"},"next":{"citation":"Hymnus tabaci 58","label":"IN EIVSDEM","url":"https://interlinea.aeterna-institute.org/library/latin/raphael-thorius/hymnus-tabaci/58","api":"https://interlinea.aeterna-institute.org/api/v1/library/latin/raphael-thorius/hymnus-tabaci/58"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}