{"kind":"section","lang":"la","language":"Latin","title":"Hymnus tabaci 58","citation":"Raphael Thorius, Hymnus tabaci 58","ref":"58","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/58","api":"https://interlinea.aeterna-institute.org/api/v1/library/latin/raphael-thorius/hymnus-tabaci/58","markdown":"https://interlinea.aeterna-institute.org/library/latin/raphael-thorius/hymnus-tabaci/58.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":199,"text":"Mitte puer lusum in glacie, ne lubrica fallat\nArea & averso vitreum caput intonet ictu\nCum natibus, referasque domum pendentia crura.\nIngere ligna foco, tremulis & vellera lumbis:\nMarmoream Cererem, lapidosaque frusta Lyaei,\nAtque humilem mensam splendenti appone camino.\nPrima domet stomachum glacie domita ipsa frementem\nBrassica, sed multo quae surgat succida lardo:\nDelicias putres callosa volumina verris\nNon moror; obtineant crassae sua silfia nares\nCretensi mergenda mero, rabidoque sinapi.\nAt potius frixis succidia juncta vitellis,\nEt veniat pleno gallina juvencula ventre,\nNon adiposa situ, sed pasta siligine sicca,\nQuae numeret varios utero praegnante nepotes.\nMox fument patinis jejuno frigore pingues,\nNunc viles epulae, turdi, regalia quondam\nFercula, felici multum curata Lucullo:\nSed mihi res pretium rebus, non copia, ponit.\nHeus ubi avis rostrata, sapit quae podice longe\nSplendidius, quam vel cerebro, vel pectore? crusto\nExcipe collapsos pendente liquamine lactes\nO gula: quam docilis, quae mandere discis oletum!\nObsessa gravius quid in urbe suasit egestes?\nSuadet frigus edax: brumali frigore fervent\nViscera, & immensae consumunt omnia noctes.\nTarde puer? nondumne suo resoluta liquori\nVina audis? & jam arripuit prope flamma lagenam Tantalea haec poena est, medios glaciata prope ignes Inter vina sitis; magna est patientia virtus. Facta, heu, vappa, merum penetrabile frigus, amici,","prev":{"citation":"Hymnus tabaci 57","label":"IN EIVSDEM","url":"https://interlinea.aeterna-institute.org/library/latin/raphael-thorius/hymnus-tabaci/57","api":"https://interlinea.aeterna-institute.org/api/v1/library/latin/raphael-thorius/hymnus-tabaci/57"},"next":{"citation":"Hymnus tabaci 59","label":"IN EIVSDEM","url":"https://interlinea.aeterna-institute.org/library/latin/raphael-thorius/hymnus-tabaci/59","api":"https://interlinea.aeterna-institute.org/api/v1/library/latin/raphael-thorius/hymnus-tabaci/59"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}