{"kind":"section","lang":"la","language":"Latin","title":"Hymnus tabaci 61","citation":"Raphael Thorius, Hymnus tabaci 61","ref":"61","level":null,"urn":null,"url":"https://interlinea.aeterna-institute.org/library/latin/raphael-thorius/hymnus-tabaci/61","api":"https://interlinea.aeterna-institute.org/api/v1/library/latin/raphael-thorius/hymnus-tabaci/61","markdown":"https://interlinea.aeterna-institute.org/library/latin/raphael-thorius/hymnus-tabaci/61.md","author":{"name":"Raphael Thorius","url":"https://interlinea.aeterna-institute.org/library/latin/raphael-thorius"},"work":{"title":"Hymnus tabaci","url":"https://interlinea.aeterna-institute.org/library/latin/raphael-thorius/hymnus-tabaci","urn":null},"verse":true,"words":175,"text":"Vtque nives vitet, niveis se moenibus abdit,\nNunc ursos pascit, capto modo pascitur urso,\nMustelam aut prandet, vulpis vel terga ligurrit.\nGaudia neu tandem festis regalibus absint,\nSortibus electum glaciata in regna sodalem\nProclamant, gelidum quoties delibat lacchum.\nSic tenebris segnes durant, nivibusque sepulti\nExpectant reducem Phoebum, fluctusque sonantes,\nVt patriam repetant rari, laribusque reportent\nDimidias aures, lapsique foramina nasi,\nPraeteritos casus dicturi astante corona,\nCastaneas sparso dum volvent igne crepantes,\nEt tumidas jungent ad singula pocula dextras.\nQuis peregre excurrat? tuto vix itur in urbe,\nPer tegulas tanto vehemens furit Aeolus aestu.\nHem muri titubare, nisi titubo ipse, videntur.\nLibate, ô Socij, & vino mulcete procellam:\nRoribus irriguis perhibent mitescere ventos.\nNemo casam repetet, positis nisi turbinis alis.\nPortentum est, quoties saxis pluit: in sua nemo\nFata ruet, medico coenam praebente, sed irae\nImpatiens si quis properat, tantisper ad ignem\nAssideat, dum Scriba venit vicinus, ut illo\nTeste palam scribat, testamentumque sigillet.\nTunc abeat, sed ne per tela incedat inermis\nInduat in victam hanc galeam, quae sorde rubenti\nIncrustata novem è clavo per lustra pependit,","prev":{"citation":"Hymnus tabaci 60","label":"IN EIVSDEM","url":"https://interlinea.aeterna-institute.org/library/latin/raphael-thorius/hymnus-tabaci/60","api":"https://interlinea.aeterna-institute.org/api/v1/library/latin/raphael-thorius/hymnus-tabaci/60"},"next":{"citation":"Hymnus tabaci 62","label":"IN EIVSDEM","url":"https://interlinea.aeterna-institute.org/library/latin/raphael-thorius/hymnus-tabaci/62","api":"https://interlinea.aeterna-institute.org/api/v1/library/latin/raphael-thorius/hymnus-tabaci/62"},"credit":{"text":"Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Hymnus_tabaci","quality":"ocr"}}