{"kind":"section","lang":"la","language":"Latin","title":"[Proverbs] 1.1.91-120","citation":"Seneca the Younger, [Proverbs] 1.1.91-120","ref":"1.1.91","level":null,"urn":null,"url":"https://interlinea.aeterna-institute.org/library/latin/seneca-the-younger/proverbs/1.1.91","api":"https://interlinea.aeterna-institute.org/api/v1/library/latin/seneca-the-younger/proverbs/1.1.91","markdown":"https://interlinea.aeterna-institute.org/library/latin/seneca-the-younger/proverbs/1.1.91.md","author":{"name":"Seneca the Younger","url":"https://interlinea.aeterna-institute.org/library/latin/seneca-the-younger"},"work":{"title":"[Proverbs]","url":"https://interlinea.aeterna-institute.org/library/latin/seneca-the-younger/proverbs","urn":null},"verse":true,"words":282,"text":"91. Homo sum: quomodo devitabo secundarum rerum invidiam?\n92. Si felicitatem iactaveris, multis dives eris.\n93. Quomodo optime potentiam tuebor? + impotentia occasionis.\n94. Locum tenet proxiinum innocentiae confessio: ubi confessio, ibi remissio.\n95. 96. Severitas in vitio est, quia proximus iniustitiae locus severitas.\n97. Bonus iudex est, qui potest dispensare non tam quid damnandum sit, sed quatenus.\n98. Quietissimam vitam agerent homines in terris, si duo haec verba e natura rerum tollerentur: meum et tuum.\n99. Qui paupertatem timet, quam timidus est!\n100. Vires tuas amici tui magis sentiant beneficiis quam iniuriis.\n101. Pecunia non satiat avaritiam, sed irritat, et ideo semper indiget.\n102. Pecunia si tibi est, + eius usura moribus.\n103. Mihi crede: non potes esse dives et felix.\n104. Auribus frequentius quam lingua utere.\n105. Quidquid dicturus es, antequam aliis, tibi dicito.\n106. Nihil interest inter iratum et insanum nisi unus dies: alter semper insanit, alter dum irascitur.\n107. Facillime bonis frueris, si ea vitaveris quae vituperaveris.\n108. Cum alios timueris, tum te ipsum maxime verere: nam sine aliis saepe esse potes, sine te numquam.\n109. Si bene te instruxeris, pudeat te deteriora facere.\n110. Quod persuaseris, erit diuturnum; quod coegeris, erit in occasione.\n111. Alteri semper ignoscito, tibi ipsi numquam.\n112. Tantum ad virtutem adicies, quantum ex voluptate abstraxeris.\n113. Stultum est somno delectari et mortem horrere, cum somnus adsiduus sit mortis imitatio.\n114. Bonis nocet qui malis parcit.\n114a. Si fatum est, quid times, quod certum est?\n115. Multi cum aliis maledicunt, sibi ipsi convicium faciunt.\n116. Nihil turpius est quam quod obicitur in obiciente cognosci.\n117. Ut licentiosa mancipia animi imperio rege linguam ventrem libidinem: quae opprimere si non potes, paululum remitte.\n118. Saepe ea, quae sanari ratione non poterant, sanata sunt tempore.\n119. Qui propter amorem pecuniae et libidinum moritur, ostendit se numquam sui causa vixisse.\n119a. Dignus tibi sit, coram quo peceare pudeat te.","prev":{"citation":"[Proverbs] 1.1.53-90","label":"[Proverbs], lines 1.1.53-1.1.90","url":"https://interlinea.aeterna-institute.org/library/latin/seneca-the-younger/proverbs/1.1.53","api":"https://interlinea.aeterna-institute.org/api/v1/library/latin/seneca-the-younger/proverbs/1.1.53"},"next":{"citation":"[Proverbs] 1.1.121-148","label":"[Proverbs], lines 1.1.121-1.1.148","url":"https://interlinea.aeterna-institute.org/library/latin/seneca-the-younger/proverbs/1.1.121","api":"https://interlinea.aeterna-institute.org/api/v1/library/latin/seneca-the-younger/proverbs/1.1.121"},"credit":{"text":"Seneca, [Proverbs]. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/sen.html","quality":"proofread"}}