{"kind":"section","lang":"la","language":"Latin","title":"Nero 27","citation":"Suetonius, Nero 27","ref":"27","level":null,"urn":"urn:cts:latinLit:phi1348.abo016.perseus-lat2:27","url":"https://interlinea.aeterna-institute.org/library/latin/suetonius/nero/27","api":"https://interlinea.aeterna-institute.org/api/v1/library/latin/suetonius/nero/27","markdown":"https://interlinea.aeterna-institute.org/library/latin/suetonius/nero/27.md","author":{"name":"Suetonius","url":"https://interlinea.aeterna-institute.org/library/latin/suetonius"},"work":{"title":"Nero","url":"https://interlinea.aeterna-institute.org/library/latin/suetonius/nero","urn":"urn:cts:latinLit:phi1348.abo016"},"verse":false,"words":94,"text":"paulatim uero inualescentibus uitiis iocularia et latebras omisit nullaque dissimulandi cura ad maiora palam erupit. Epulas a medio die ad mediam noctem protrahebat, refotus saepius calidis piscinis ac tempore aestiuo niuatis; cenitabatque nonnumquam et in publico, naumachia praeclusa uel Martio campo uel circo maximo, inter scortorum totius urbis et ambubaiarum ministeria. quotiens Ostiam Tiberi deflueret aut Baianum sinum praeternauigaret, dispositae per litora et ripas deuersoriae tabernae parabantur insignes ganea et matronarum institorio copas imitantium atque hinc inde hortantium ut appelleret. indicebat et familiaribus cenas, quorum uni mitellita quadragies sestertium constitit, alteri pluris aliquanto rosaria.","prev":{"citation":"Nero 26.2","label":"Chapter 26","url":"https://interlinea.aeterna-institute.org/library/latin/suetonius/nero/26.2","api":"https://interlinea.aeterna-institute.org/api/v1/library/latin/suetonius/nero/26.2"},"next":{"citation":"Nero 28.1","label":"Chapter 28","url":"https://interlinea.aeterna-institute.org/library/latin/suetonius/nero/28.1","api":"https://interlinea.aeterna-institute.org/api/v1/library/latin/suetonius/nero/28.1"},"credit":{"text":"Suetonius, Nero, ed. Maximilian Ihm. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi1348/abo016/phi1348.abo016.perseus-lat2.xml","quality":"proofread"}}