{"kind":"section","lang":"la","language":"Latin","title":"Tiberius 52","citation":"Suetonius, Tiberius 52","ref":"52","level":null,"urn":"urn:cts:latinLit:phi1348.abo013.perseus-lat2:52","url":"https://interlinea.aeterna-institute.org/library/latin/suetonius/tiberius/52","api":"https://interlinea.aeterna-institute.org/api/v1/library/latin/suetonius/tiberius/52","markdown":"https://interlinea.aeterna-institute.org/library/latin/suetonius/tiberius/52.md","author":{"name":"Suetonius","url":"https://interlinea.aeterna-institute.org/library/latin/suetonius"},"work":{"title":"Tiberius","url":"https://interlinea.aeterna-institute.org/library/latin/suetonius/tiberius","urn":"urn:cts:latinLit:phi1348.abo013"},"verse":false,"words":147,"text":"Filiorum neque naturalem Drusum neque adoptiuum Germanicum patria caritate dilexit, alterius uitiis infensus. nam Drusus fluxioris remissiorisque uitae erat. itaque ne mortuo quidem perinde adfectus est, sed tantum non statim a funere ad negotiorum consuetudinem rediit iustitio longiore inhibito. quin et Iliensium legatis paulo serius consolantibus, quasi obliterata iam doloris memoria, irridens se quoque respondit uicem eorum dolere, quod egregium ciuem Hectorem amisissent. Germanico usque adeo obtrectauit, ut et praeclara facta eius pro superuacuis eleuarit et gloriosissimas uictorias ceu damnosas rei p. increparet. quod uero Alexandream propter immensam et repentinam famem inconsulto se adisset, questus est in senatu. etiam causa mortis fuisse ei per Cn. Pisonem legatum Syriae creditur, quem mox huius criminis reum putant quidam mandata prolaturum, nisi ea secreto ostentant … quae multifariam inscriptum et per noctes celeberrime adclamatum est: 'redde Germanicum!' quam suspicionem confirmauit ipse postea coniuge etiam ac liberis Germanici crudelem in modum afflictis.","prev":{"citation":"Tiberius 51.2","label":"Chapter 51","url":"https://interlinea.aeterna-institute.org/library/latin/suetonius/tiberius/51.2","api":"https://interlinea.aeterna-institute.org/api/v1/library/latin/suetonius/tiberius/51.2"},"next":{"citation":"Tiberius 53.1","label":"Chapter 53","url":"https://interlinea.aeterna-institute.org/library/latin/suetonius/tiberius/53.1","api":"https://interlinea.aeterna-institute.org/api/v1/library/latin/suetonius/tiberius/53.1"},"credit":{"text":"Suetonius, Tiberius, ed. Maximilian Ihm. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi1348/abo013/phi1348.abo013.perseus-lat2.xml","quality":"proofread"}}