{"kind":"section","lang":"la","language":"Latin","title":"Relationes 21","citation":"Symmachus, Relationes 21","ref":"21","level":null,"urn":null,"url":"https://interlinea.aeterna-institute.org/library/latin/symmachus/relationes/21","api":"https://interlinea.aeterna-institute.org/api/v1/library/latin/symmachus/relationes/21","markdown":"https://interlinea.aeterna-institute.org/library/latin/symmachus/relationes/21.md","author":{"name":"Symmachus","url":"https://interlinea.aeterna-institute.org/library/latin/symmachus"},"work":{"title":"Relationes","url":"https://interlinea.aeterna-institute.org/library/latin/symmachus/relationes","urn":null},"verse":false,"words":425,"text":"Scio quidem naturae humanae vitio probitatem subiacere livori, sed miror eo progressas insidias aemulorum, ut crudo mendacio insontis fama peteretur, ddd. imppp. quid enim non audeant quidve intemptatum relinquant, qui in arce terrarum Christianae legis iniuriis vindicata fana finxerunt? flevit, credo, scaenae istius fabricator, cum de ecclesiae penetralibus raptos ad tormenta simularet, cum de longinquis ac finitimis urbibus duci antistites in vincla describeret; neque enim serenum clementiae tuae animum sine his argutiis conpulisset sacro edicto populum convenire, ut asperioribus , quam pietati tuae mos est, litteris praefectura, quem sine ambitu legistis, argueres . reddat nunc, quisquis ille est, causas fallaciae suae, qui sub occasione iustae inquisitionis, qua me cultum spoliatorum moenium investigare iussistis, tragicas quaestiones de ministris catholicae iactavit agitatas; respondeat litteris episcopi Damasi , quibus adsectatores eiusdem religionis negavit ullam contumeliam pertulisse. non magnopere officii mei praetendo responsa, a quo ideo quaesita est rerum fides, ne factum aliquod recordationem cognitoris effugeret: credatur eius legis antistiti, quae laesa simulatur, credatur populo Romano, qui perennitatis vestrae admonitus edicto miratur in procinctu creditum, quod Roma nescit admissum. omitto iniuriam praefecturae et conscientiae meae, quando eo processit insimulatio, ut vos quoque ipsos auctores honoris mei quadam reprehensione praestringat. nam qui summi loci iudices decolorant, sacri testimonii facilitatem videntur incessere. iam dudum me divus genitor numinis tui praecipuo honore dignatus est, ille meritorum arbiter singularis. cuius imperium cum moribus recepisti. paternum sequere , tuum tuere iudicium: qui praefecturam sine ambitu meruimus, sine offensione ponamus. suggestionibus viri excellentis et de re publica bene meriti Praetextati praefecti praetorio abusus existimor. quid, si ex illo decreto. quod probabiliter impetravit, necdum a me quaestio ulla temptata est? praevidi enim, quid possint aemuli suspicari, atque ideo obsignata officio praefecturae sacra iussa commiseram . nec me huiusmodi coniectura decepit: siquidem severe executus insimulor, quod non convincor adgressus. haec omnia fide actorum conprehensa subieci, unum illud adiciens, ut me perennitas vestra necessitate inquisitionis huius absolvat, cuius auctoritatem referri ad scrinia palatina iussistis. nam si tantum de me inprobis licuit extante praecepto, quid retractatis litteris non licebit? sane laudabili viro episcopo denegante ullum e suis aut carcere aut vinculis adtineri et officio eadem suggerente ignoro, quos potissimum praeceperitis absolvi. tenent quidem leges variorum criminum reos, sed ut conperi, a ministerio Christianae legis alienos. quid igitur aeternitas vestra decernat, devotus opperior et quaeso, ut fallaciam retundatis, quae divini pectoris tui sollicitavit quietem, quae ad edicti necessitatem venerandi principis curam coegit. me munivit invidia: apud aures enim sacras locum postea non habebit convicta mendacii. si quid tamen denuo obtrectantium murmur ingesserit, opto iudicium: experientur me sub imperiali disceptatione constantem, qui nocentem probare non possunt.","prev":{"citation":"Relationes 20","label":"XX (XXXIII. XXXX) a. 384–385. DDD. nnn.","url":"https://interlinea.aeterna-institute.org/library/latin/symmachus/relationes/20","api":"https://interlinea.aeterna-institute.org/api/v1/library/latin/symmachus/relationes/20"},"next":{"citation":"Relationes 22","label":"XXII (XXXV. XXXXII) a. 384–385.","url":"https://interlinea.aeterna-institute.org/library/latin/symmachus/relationes/22","api":"https://interlinea.aeterna-institute.org/api/v1/library/latin/symmachus/relationes/22"},"credit":{"text":"Symmachus, Relationes. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000794.zip","quality":"proofread"}}