{"kind":"section","lang":"la","language":"Latin","title":"Relationes 39","citation":"Symmachus, Relationes 39","ref":"39","level":null,"urn":null,"url":"https://interlinea.aeterna-institute.org/library/latin/symmachus/relationes/39","api":"https://interlinea.aeterna-institute.org/api/v1/library/latin/symmachus/relationes/39","markdown":"https://interlinea.aeterna-institute.org/library/latin/symmachus/relationes/39.md","author":{"name":"Symmachus","url":"https://interlinea.aeterna-institute.org/library/latin/symmachus"},"work":{"title":"Relationes","url":"https://interlinea.aeterna-institute.org/library/latin/symmachus/relationes","urn":null},"verse":false,"words":252,"text":"Facit plerumque ratio aut fortuna causarum, ut in controversiis alter aequitate alter iure nitatur; tunc humane labante consilio deliberatio cognitoris ad elementiae vestrae recurrit oraculum, ddd. imppp., quod etiam praesentis negotii qualitas depoposcit . nam Musa annos egressa legitimos, cum in partem rerum paternarum Syntrophium quereretur admissum, quem veluti adultae suae fratrem dolus Acholii curatoris adsciverat, integri restaurationem suffragio iuris accepit, sed multis provocationibus variisque tracta iudiciis intra metas iusti temporis nequivit exequi propositas actiones. ut res monebat, amissum beneficium remedio integravit supplicationis; sed idem mulierem casus etiam rescripti sacri humanitate fraudavit. siquidem mensium quattuor dilata curriculis supremo die temporis impetrati excidit; cognitorem namque successor adveniens praemisso interdicto potestate privaverat. post haec cum vellet infelicem causae lapsum reparatione sarcire, obiectu Constantinianae legis explosa est, quae extra ordinem temporibus indultis longiorem negavit excursum. secuta est provocatio iudicatum. ubi ventum ad sacrae sedis examen et eadem constitutio a Faustino herede Acholii curatoris rursus ingesta est, pars procuratoris, cui actiones Musa mandaverat , non suo vitio causam cecidisse temporibus adprobavit. ad hoc parentum numinis vestri divorum principum protulit sanctionem, quae inter reliquas exceptiones reparationem iurgantibus tribuit, si per cognitorem causa labatur. cum igitur et in Constantiniana lege, qua reparatio adimitur temporibus extra ordinem datis, casus iste cessantis disceptatoris non sit exceptus et recentiora scita divorum cunctis negotiis reparatione subvenerint, si forte a iudice deserantur, facilis in alteram partem esse non potui, sed quod unum remedium convenit rebus ambiguis, fortunam curiosi luctaminis augustissimis legum arbitris reservavi gestis omnibus de more subiectis, ut eorum lectio insinuationis meae adstruat veritatem.","prev":{"citation":"Relationes 38","label":"XXXVIII (LI. LVIII) a. 384–385.","url":"https://interlinea.aeterna-institute.org/library/latin/symmachus/relationes/38","api":"https://interlinea.aeterna-institute.org/api/v1/library/latin/symmachus/relationes/38"},"next":{"citation":"Relationes 40","label":"XXXX (LIII. LX) a. 384–385.","url":"https://interlinea.aeterna-institute.org/library/latin/symmachus/relationes/40","api":"https://interlinea.aeterna-institute.org/api/v1/library/latin/symmachus/relationes/40"},"credit":{"text":"Symmachus, Relationes. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000794.zip","quality":"proofread"}}