{"kind":"section","lang":"la","language":"Latin","title":"Relationes 47","citation":"Symmachus, Relationes 47","ref":"47","level":null,"urn":null,"url":"https://interlinea.aeterna-institute.org/library/latin/symmachus/relationes/47","api":"https://interlinea.aeterna-institute.org/api/v1/library/latin/symmachus/relationes/47","markdown":"https://interlinea.aeterna-institute.org/library/latin/symmachus/relationes/47.md","author":{"name":"Symmachus","url":"https://interlinea.aeterna-institute.org/library/latin/symmachus"},"work":{"title":"Relationes","url":"https://interlinea.aeterna-institute.org/library/latin/symmachus/relationes","urn":null},"verse":false,"words":161,"text":"Bellorum quidem vestrorum gloriosos exitus fama non occulit, sed maior est victoriae fides, quae oculis adprobatur, ddd. imppp. Valentiniane Theodosi et Arcadi inclyti victores ac triumphatores semper Augusti. dudum fando acceperat Romanus populus caesorum funera Sarmatarum, at nunc confirmata est nuntiorum laetitia spectaculo triumphali. iam minores non sumus vetustatis exemplis: vidimus, quae lecta mirabamur, catenatum agmen victae gentis induci illosque tam truces pridem vultus misero pallore mutatos. stetit harenae medio subiecta voluptati, quae fuit ante formidini , et adsuetae armis gentilibus manus gladiatoria instrumenta timuerunt. felicem nimis belli istius ducem, qui divinae clementiae vestrae fretus auspiciis ex hostium numero alios ad securitatem provinciarum penitus extinxit, alios ad laetitiam plebis Martiae reservavit. merito illi iudicia vestra respondent, iure in litteris imperialibus saepe celebratur; neque enim tanta devotio digniorem possit invenire praeconem. sit vobis frequens usus ac facilis laurearum, et eos, qui forte ausus inpios in Romanum nomen extulerint, fortitudo militum capiat, harena urbis expendat. perpetua haec devotis civibus virtutis vestrae tamquam tributa praestetis.","prev":{"citation":"Relationes 46","label":"XXXXVI (LX. LXVII) a. 384–385.","url":"https://interlinea.aeterna-institute.org/library/latin/symmachus/relationes/46","api":"https://interlinea.aeterna-institute.org/api/v1/library/latin/symmachus/relationes/46"},"next":{"citation":"Relationes 48","label":"XXXXVIII (LXII. LXVIIII) a. 384–385.","url":"https://interlinea.aeterna-institute.org/library/latin/symmachus/relationes/48","api":"https://interlinea.aeterna-institute.org/api/v1/library/latin/symmachus/relationes/48"},"credit":{"text":"Symmachus, Relationes. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000794.zip","quality":"proofread"}}