{"kind":"section","lang":"la","language":"Latin","title":"Sententiae, appendix 132-176","citation":"Syrus, Sententiae, appendix 132-176","ref":"132","level":null,"urn":null,"url":"https://interlinea.aeterna-institute.org/library/latin/syrus/sententiae-appendix/132","api":"https://interlinea.aeterna-institute.org/api/v1/library/latin/syrus/sententiae-appendix/132","markdown":"https://interlinea.aeterna-institute.org/library/latin/syrus/sententiae-appendix/132.md","author":{"name":"Syrus","url":"https://interlinea.aeterna-institute.org/library/latin/syrus"},"work":{"title":"Sententiae, appendix","url":"https://interlinea.aeterna-institute.org/library/latin/syrus/sententiae-appendix","urn":null},"verse":true,"words":281,"text":"Hominum excusare uitia damnare est deos.\nHomo qui tacere nescit, nescit dicere.\nHonesta fama praeterit pecuniam.\nHonesta lex est temporis necessitas.\nIacente quercu quiuis lignatum uenit.\nId agas, ne quis aut contemnere aut uereri te uelit.\nIdem amat, qui amicus est, non idem amicus est, qui amat.\nIdem amico praestes, tibi quod praestari uelis.\nIgnauus omnis omni cessat tempore.\nIgni probatur aurum, uirtus miseria.\nIgnoscas semper alteri, nunquam tibi.\nIllaesa non ullum ictum fert felicitas.\nImago est animi sermo, uitae oratio.\nImbecilli ad alienam oculi lippitudinem fluunt.\nImperare, non seruire conuenit pecuniae.\nImpolitam caue relinquas quam aedificaueris, domum.\nImprobis parcendum est ciuibus, ut membris languentibus.\nIn aliis rebus alius est praestantior.\nIn fortuna sese efferre fortunae est succumbere.\nIn recessu habeas seuerum, in procinctu clementiam.\nIngenita cuique caritas nostrum est sui.\nInhoneste uincit, armis qui uincit suos.\nIniquitati proxima est seueritas.\nInopia est turpis, quae uenit de copia.\nIn partem quod est perceptum, non in totum fallitur.\nIntellegas, ut facias, ecquae sint bona.\nInuidia semper aduersa est felicibus.\nIpsa inquieta exagitat se felicitas.\nIra premetur, qui non iram presserit.\nIrae exitus fit paenitentiae initium.\nIrae remedium maximum est dilatio.\nIrritat auidum, non explet pecunia.\nIta agas alienum, ut tuum non neglegas negotium.\n+ Ita amico prosis, ut ne quid noceas tibi.\nIt per alta uirtus, sequitur humilis tuta inertia.\nLabor imperantis militum est securitas.\nLatius terrent potentum, ut fulmina, poenae, quam nocent.\nLaudatur, qui etiam seruis moderate imperat.\nLeue debitorem facit aes, inimicum graue.\nLite amicorum religio comprobatur iudicis.\nMagis animi ulceribus quam medendum est corporis.\nMagis libenter, quam loquaris, audias.\nMagnopere quid sis, nil quid habeare interest.\nMagnus superne iniuriam animus despicit.\nMale habet uir medicus, hominum male cum nemo habet.","prev":{"citation":"Sententiae, appendix 88-131","label":"Lines 88-131","url":"https://interlinea.aeterna-institute.org/library/latin/syrus/sententiae-appendix/88","api":"https://interlinea.aeterna-institute.org/api/v1/library/latin/syrus/sententiae-appendix/88"},"next":{"citation":"Sententiae, appendix 177-219","label":"Lines 177-219","url":"https://interlinea.aeterna-institute.org/library/latin/syrus/sententiae-appendix/177","api":"https://interlinea.aeterna-institute.org/api/v1/library/latin/syrus/sententiae-appendix/177"},"credit":{"text":"Syrus, Sententiae, appendix. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PVBLIL%7Cappe%7C001","quality":"proofread"}}