{"kind":"section","lang":"la","language":"Latin","title":"Sententiae, appendix 220-257","citation":"Syrus, Sententiae, appendix 220-257","ref":"220","level":null,"urn":null,"url":"https://interlinea.aeterna-institute.org/library/latin/syrus/sententiae-appendix/220","api":"https://interlinea.aeterna-institute.org/api/v1/library/latin/syrus/sententiae-appendix/220","markdown":"https://interlinea.aeterna-institute.org/library/latin/syrus/sententiae-appendix/220.md","author":{"name":"Syrus","url":"https://interlinea.aeterna-institute.org/library/latin/syrus"},"work":{"title":"Sententiae, appendix","url":"https://interlinea.aeterna-institute.org/library/latin/syrus/sententiae-appendix","urn":null},"verse":true,"words":279,"text":"Nil posse est esse mortuum, non uiuere.\nNil rationis est, adfectus ubi quid inductum est semel.\nNil refert quantum habeas: illud multo est plus quod non habes.\nNil sapiendo homini transitur uita optime.\nNil ubi est a rege tutum, tutus nunquam est rex diu.\nNocens fit, hominis ubi succubuerit fides.\n+ Nocere nescit, qui se uelle prodidit.\nNoli hominum quemquam nosse, nedum omnes uelis.\nNolle peccare ubi potueris, pretium est innocentiae.\nNon aberres a fortuna: semper sua quemque obsidet.\nNon aliis risum, qui ex se cepit, praebuit.\nNon cui parum est, sed qui cupit plus, pauper est.\n+ Non est beatus, esse qui se non putat.\nNon est pusillum, quicquid minus est maximo.\nNon est tuum, fortuna quod fecit tuum.\nNon est ulla tam bona uxor, de qua nil possis queri.\nNon ex uno omnes sunt modulo calceandi hominum pedes.\nNon liber est, qui imperio seruit corporis.\nNon pote diuitias animus infirmus pati.\nNon refert quam multis placeas, quam bonis placeas, uide.\nNon scelere oportet uindicare unquam scelus.\nNon solet spectare causam, sed fortunam misericors.\nNon uitium est, cui non sit patrocinium suum.\nNon uiuit, qui nil cogitat nisi uiuere.\nNondum est beatus, turba quem non riserit.\nNulla maior quam iram amico condonare est gloria.\n+ Nulli imponas, quod ipse non possis pati.\nNullum homine in terris animal est morosius.\nNullum sine auctoramento est aliquo malum.\nNunc sunt auloedi, qui fieri citharoedi non potuerunt.\nNunquam accepti, dati obliuiscaris cito.\nNunquam non aliquid superest diligentiae.\nNunquam non timere mortem, quam mori est crudelius.\nNunquam uenit liquidum aut sincerum ex turbido.\nOdi puerulos praecoqui sapientia.\nOmne tranquillum ubi uidetur, non deest nociturum tibi.\nOmnem laborem spes solatur praemi.\nOmnes differentes uitam mors incerta praeuenit.","prev":{"citation":"Sententiae, appendix 177-219","label":"Lines 177-219","url":"https://interlinea.aeterna-institute.org/library/latin/syrus/sententiae-appendix/177","api":"https://interlinea.aeterna-institute.org/api/v1/library/latin/syrus/sententiae-appendix/177"},"next":{"citation":"Sententiae, appendix 258-298","label":"Lines 258-298","url":"https://interlinea.aeterna-institute.org/library/latin/syrus/sententiae-appendix/258","api":"https://interlinea.aeterna-institute.org/api/v1/library/latin/syrus/sententiae-appendix/258"},"credit":{"text":"Syrus, Sententiae, appendix. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PVBLIL%7Cappe%7C001","quality":"proofread"}}