{"kind":"section","lang":"la","language":"Latin","title":"Sententiae, appendix 299-338","citation":"Syrus, Sententiae, appendix 299-338","ref":"299","level":null,"urn":null,"url":"https://interlinea.aeterna-institute.org/library/latin/syrus/sententiae-appendix/299","api":"https://interlinea.aeterna-institute.org/api/v1/library/latin/syrus/sententiae-appendix/299","markdown":"https://interlinea.aeterna-institute.org/library/latin/syrus/sententiae-appendix/299.md","author":{"name":"Syrus","url":"https://interlinea.aeterna-institute.org/library/latin/syrus"},"work":{"title":"Sententiae, appendix","url":"https://interlinea.aeterna-institute.org/library/latin/syrus/sententiae-appendix","urn":null},"verse":true,"words":282,"text":"Qui insanit ipse, furere credit ceteros.\nQui nummo Venerique immoritur, non uisit causa sua.\nQui pipere abundat, oleribus miscet piper.\nQui potest, non uult ulcisci, iure clementem uoces.\nQui se fugere credit, media solet in fata incurrere.\nQuicquam agas caue quod non debes aut quod debes neglegas.\nQuicquid datur spei improbae, nunquam est satis.\nQuicquid plus aequo est futurum, in mitius praeponderet.\nQuicquid sibi imperauit, animus obtinet.\nQuid est iusiurandum? alieni emplastrum aeris est.\nQuid queas ab hoc sperare, quem esse docueris malum?\nQuid quisque posset, nisi temptando nesciit.\nQuod nescias, damnare summa est temeritas.\nQuod uis sileri, cuiquam noli dicere.\n+ Quod uult, habet, qui uelle quod satis est potest.\nQuot serui, totidem multis sunt hostes domi.\nRapienda, non capienda agendi occasio est.\nRationi te subicias, si omnia uis tibi.\nRecti magister metus est infidelior.\nRefert bonorum exemplis puniri improbos.\nRefert quam bene, non refert quam uiuas diu.\nRege saluo una est mens omnibus, amisso cassa est fides.\nRegi tyrannus re distat, non nomine.\nRegibus est ex mansuetudine certior securitas.\nReligiosum odio est nocentis perdere innocentiam.\nReprimit paucorum omnium odium uindicta irritat frequens.\nRex, cui se irascendo exaequat, non multum supereminet.\nRixa amicorum animos soluit, confirmat sapientia.\nRosam praeteritam nequiquam est requirere.\nSaepe dissimulare satius, quam uelle ulcisci fuit.\nSaepe fortuna innocentem, nunquam spes bona deserit.\nSaepe qui uicit post sanguinem, audax spectat sanguinem.\nSaeua ex animaduersione nulla regi est gloria.\nSani animi feruntur motus nostro arbitrio, non suo.\nSapienti amicus magnae est uirtutis locus.\n+ Sapienti praestat tacere pro se, quam contra loqui.\nSapit nequiquam, qui sibi ipse non sapit.\nSatis poenarum potuisse est punirier.\nScelus tutum esse pote, securum non pote.\nScit bonus iudex non tam quid, quam qua damnet cernere.","prev":{"citation":"Sententiae, appendix 258-298","label":"Lines 258-298","url":"https://interlinea.aeterna-institute.org/library/latin/syrus/sententiae-appendix/258","api":"https://interlinea.aeterna-institute.org/api/v1/library/latin/syrus/sententiae-appendix/258"},"next":{"citation":"Sententiae, appendix 339-380","label":"Lines 339-380","url":"https://interlinea.aeterna-institute.org/library/latin/syrus/sententiae-appendix/339","api":"https://interlinea.aeterna-institute.org/api/v1/library/latin/syrus/sententiae-appendix/339"},"credit":{"text":"Syrus, Sententiae, appendix. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PVBLIL%7Cappe%7C001","quality":"proofread"}}