{"kind":"section","lang":"la","language":"Latin","title":"Sententiae, appendix 339-380","citation":"Syrus, Sententiae, appendix 339-380","ref":"339","level":null,"urn":null,"url":"https://interlinea.aeterna-institute.org/library/latin/syrus/sententiae-appendix/339","api":"https://interlinea.aeterna-institute.org/api/v1/library/latin/syrus/sententiae-appendix/339","markdown":"https://interlinea.aeterna-institute.org/library/latin/syrus/sententiae-appendix/339.md","author":{"name":"Syrus","url":"https://interlinea.aeterna-institute.org/library/latin/syrus"},"work":{"title":"Sententiae, appendix","url":"https://interlinea.aeterna-institute.org/library/latin/syrus/sententiae-appendix","urn":null},"verse":true,"words":279,"text":"Securus moritur, arti qui immoritur suae.\nSemper facit a magnis improba ad maiora spes gradum.\nSemper redundat ipsum in auctorem timor.\nSeueritate adsidua perit auctoritas.\nSimulator etiam uultu amicum decipit.\nSi qua ueniunt casu ad effectum, ars uocari non potest.\nSibi amicum, amicus nisi cui ipse est, nemo putet.\nSibi imperare quemque imperium est maximum.\nSibi placent boni manentque mores: leuis est malitia.\nSine arbitro caue credas esse ullum locum.\nSocia est et consors mortis uita ingloria.\nStultum est aliis imperare uelle, qui nescit sibi.\nStultum est formidare numerum, qua transire unus potest.\nStultum est timere, quod uitari non potest.\nStultus est, bonis malisque qui ignoscit promiscue.\nSua affluit uirtute, qui alienas amat.\nSua ipsius nequitia poena est maxima.\nSuam cito in naturam fictum recidit.\nSuauis laborum est praeteritorum memoria.\nSubinde bos alienus prospectat foras.\nSuspecta sunt ipsa ornamenta ementibus.\nTacere nunquam, saepe paenituit loqui.\nTam omni quam nulli ignoscere est crudelitas.\nTam sunt mali ministri adfectus quam duces.\nTam turpe nil est, quam uitam incipiens senex.\nTam turpes sunt principi, quam medico multorum neces.\n+ Tarda etiam est ipsa cupiditati celeritas.\nTelum fuit grauissimum patribus fides.\nTorquere corpus contra naturam est suum.\nTranquillo quiuis est gubernator mari.\nTurpe tibi uni dictum rides, indignaris pluribus.\nVbi aurum loquitur, nil potest oratio.\nVbi cesses facere, nil prodest bene discere.\nVbi maxime laeteris, metuas maxime.\nVbi peccat solitum remedium, temptatur contrarium.\nVbi sis maritimus, terra caue mutes mare.\nVbicumque quisque est, patria est, ubicumque est bene.\nVltro ad bonorum cenas accedunt boni.\nVnde ueneris, reuerti, si sapias, nil est graue.\nVt amere, ames! amoris poculum optimum est.\nVt Charybdis implacata est hominis iracundia.\nVt fidas, cum amico multos simul edas modios salis.","prev":{"citation":"Sententiae, appendix 299-338","label":"Lines 299-338","url":"https://interlinea.aeterna-institute.org/library/latin/syrus/sententiae-appendix/299","api":"https://interlinea.aeterna-institute.org/api/v1/library/latin/syrus/sententiae-appendix/299"},"next":{"citation":"Sententiae, appendix 381-390","label":"Lines 381-390","url":"https://interlinea.aeterna-institute.org/library/latin/syrus/sententiae-appendix/381","api":"https://interlinea.aeterna-institute.org/api/v1/library/latin/syrus/sententiae-appendix/381"},"credit":{"text":"Syrus, Sententiae, appendix. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PVBLIL%7Cappe%7C001","quality":"proofread"}}