{"kind":"section","lang":"la","language":"Latin","title":"Sententiae, appendix 45-87","citation":"Syrus, Sententiae, appendix 45-87","ref":"45","level":null,"urn":null,"url":"https://interlinea.aeterna-institute.org/library/latin/syrus/sententiae-appendix/45","api":"https://interlinea.aeterna-institute.org/api/v1/library/latin/syrus/sententiae-appendix/45","markdown":"https://interlinea.aeterna-institute.org/library/latin/syrus/sententiae-appendix/45.md","author":{"name":"Syrus","url":"https://interlinea.aeterna-institute.org/library/latin/syrus"},"work":{"title":"Sententiae, appendix","url":"https://interlinea.aeterna-institute.org/library/latin/syrus/sententiae-appendix","urn":null},"verse":true,"words":276,"text":"Calamitas est uirtutis saepe occasio.\nCautum se timidus, sordidus parcum uocat.\nCaue amici inuidias inimici insidiis magis.\nCaue hominum quisquam te oderit merito tuo.\nCaue quod turpe est facere, credas esse honestum dicere.\nCaue semper hominem, qui tibi imposuit semel.\nCito nemo locuples factus est, qui est uir bonus.\nClemens est superior lenis qui inferiorem ulciscitur.\nCaeli sereni facies moderati imperii est.\nCogit rogando, cum rogat potentior.\nCommune exitium naufragis solacio est.\nConscientiae quam famae potius est intendere.\nConsilium luce, nocte agas conuiuium.\nConsuetudinem peccandi fecit uis peccantium.\nConterunt plebeia celsum saepe dicta uerticem.\nCrebro si iacias, iacias alia aliud uice.\nCriminibus felix nemo fuit unquam diu.\nCrudelis est, non clemens, qui desaeuiit.\nCui conuenit bene cum pauperie, diues est.\nCuique hominum mores fingunt fortunam sui.\nCuius telum elusum opposita est ueste, non minus est latro.\nCuiuis artifici in arte credendum est sua.\nCum ad duo festinas, neutrum perficias bene.\nCum camelus cuperet cornua, aures etiam perdidit.\nCum hominibus pacem, bellum cum uitiis agas.\nCum pari certamen anceps, furor aut turpe est cum impari.\nCum uniuerso ipsum rapi ingens mortis est solacium.\nCustodias quid dicas, non quid cogites.\nDamnat, non odit improbum iudex bonus.\n+ Damnum nisi ex abundanti raro euenit.\nDari bonum quod potuit auferri potest.\nDatur maiorum nulla meritis gloria.\nDecet omnium regem esse clementissimum.\nDedit unus spiritum, unus eripiet tibi.\nDeformis simiorum est formosissimus.\nDelicatior est, cui alieno condoluit nisu latus.\nDemens est, si quis praestat errori fidem.\nDeo fauente nauiges uel uimine.\nDeo sic lubitum est similem ad similem ducere.\nDespicias melius uitam, quam custodias.\nDeum ut deus, naturam natura opprimit.\nDies habetur nunc nouerca, nunc parens.\nDifficile amicos re probare est prospera.","prev":{"citation":"Sententiae, appendix 1-44","label":"Lines 1-44","url":"https://interlinea.aeterna-institute.org/library/latin/syrus/sententiae-appendix/1","api":"https://interlinea.aeterna-institute.org/api/v1/library/latin/syrus/sententiae-appendix/1"},"next":{"citation":"Sententiae, appendix 88-131","label":"Lines 88-131","url":"https://interlinea.aeterna-institute.org/library/latin/syrus/sententiae-appendix/88","api":"https://interlinea.aeterna-institute.org/api/v1/library/latin/syrus/sententiae-appendix/88"},"credit":{"text":"Syrus, Sententiae, appendix. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PVBLIL%7Cappe%7C001","quality":"proofread"}}