{"kind":"section","lang":"la","language":"Latin","title":"Eunuchus pr","citation":"Terence, Eunuchus pr","ref":"pr","level":null,"urn":"urn:cts:latinLit:phi0134.phi003.perseus-lat2:pr","url":"https://interlinea.aeterna-institute.org/library/latin/terence/eunuchus/pr","api":"https://interlinea.aeterna-institute.org/api/v1/library/latin/terence/eunuchus/pr","markdown":"https://interlinea.aeterna-institute.org/library/latin/terence/eunuchus/pr.md","author":{"name":"Terence","url":"https://interlinea.aeterna-institute.org/library/latin/terence"},"work":{"title":"Eunuchus","url":"https://interlinea.aeterna-institute.org/library/latin/terence/eunuchus","urn":"urn:cts:latinLit:phi0134.phi003"},"verse":true,"words":294,"text":"Si quisquam est qui placere se studeat bonis\nQuam plurimis et minime multos laedere,\nIn his poeta hic nomen profitetur suum.\nTum si quis est qui dictum in se inclementius\nExistimavit esse, sic existimet,\nResponsum non dictum esse, quia laesit prior,\nQui bene vertendo, et easdem scribendo male, ex\nGraecis bonis Latinas fecit non bonas.\nIdem Menandri Phasma nunc nuper dedit;\nAtque in Thesauro scripsit causamn dicere\nPrius unde petitur aurum quare sit suumn\nQuam ille qui petit unde is sit thesaurus sibi,\nAut unde in patrium monumentum pervenerit.\nDehinc ne frustretur ipse se, aut sic cogitet,\nDefunctus iam sum, nihil est quod dicat mihi;\nIs ne erret moneo et desinat lacessere.\nHabeo alia multa quae nunc condonabitur;\nQuae proferentur post, si perget laedere\nIta ut facere instituit. Quam nunc acturi sumus\nMenandri Eunuchum postquam Aediles emerunt,\nPerfecit sibi ut inspiciendi esset copia.\nMagistratus cum ibi adessent occepta est agi.\nExclamat furem non poetam fabulam\nDedisse, et nihil dedisse verborum tamen;\nColacem esse Naevi et Plauti veterem fabulam;\nParasiti personam inde ablatam et militis.\nSi id est peccatum, peccatum imprudentia est\nPoetae; non qui furtum facere studuerit.\nId ita esse vos iam iudicare poteritis.\nColax Menandri est; in ea est parasitus Colax,\nEt miles gloriosus; eas se non negat\nPersonas transtulisse in Eunuchum suam\nEx Graeca; sed eas fabulas factas prius\nLatinas scisse sese id vero pernegat.\nQuod si personis iisdem uti aliis non licet,\nQui magis licet currentes servos scribere,\nBonas matronas facere, meretrices malas,\nParasitum edacem, gloriosum militem,\nPuerum supponi, falli per servum senem,\nAmare, odisse, suspicari? Denique\nNullum est iam dictum, quod non dictum sit prius.\nQuare aequum est vos cognoscere atque ignoscere\nQuae veteres factitarunt si faciunt novi.\nDate operam, et cum silentio animadvertite,\nUt pernoscatis quid sibi Eunuchus velit.","prev":null,"next":{"citation":"Eunuchus 1.1","label":"Act 1","url":"https://interlinea.aeterna-institute.org/library/latin/terence/eunuchus/1.1","api":"https://interlinea.aeterna-institute.org/api/v1/library/latin/terence/eunuchus/1.1"},"credit":{"text":"Terence, Eunuchus, ed. Edward St. John Parry. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0134/phi003/phi0134.phi003.perseus-lat2.xml","quality":"proofread"}}