{"kind":"section","lang":"la","language":"Latin","title":"Phormio pr","citation":"Terence, Phormio pr","ref":"pr","level":null,"urn":"urn:cts:latinLit:phi0134.phi004.perseus-lat2:pr","url":"https://interlinea.aeterna-institute.org/library/latin/terence/phormio/pr","api":"https://interlinea.aeterna-institute.org/api/v1/library/latin/terence/phormio/pr","markdown":"https://interlinea.aeterna-institute.org/library/latin/terence/phormio/pr.md","author":{"name":"Terence","url":"https://interlinea.aeterna-institute.org/library/latin/terence"},"work":{"title":"Phormio","url":"https://interlinea.aeterna-institute.org/library/latin/terence/phormio","urn":"urn:cts:latinLit:phi0134.phi004"},"verse":true,"words":223,"text":"POSTQUAM poeta vetus poetam non potest\nRetrahere ab studio, et transdere hominem in otium,\nMaledictis deterrere ne scribat parat;\nQui ita dictitat, quas antehae fecit fabulas\nTenui esse oratione et scriptura levi;\nQuia nusquam insanum scripsit adolescentulum\nCervam videre fugere, et sectari canes,\nEt eam plorare, orare ut subveniat sibi.\nQuod si intelligeret, olim quum stetit nova,\nActoris opera magis stetisse quam sua,\nMinus multo audacter quam nunc laedit laederet.\nNunc si quis est qui hoc dicat, aut sic cogitet;\nVetus si poeta non lacessisset prior,\nNullum invenire prologum potuisset novus\nQuem diceret, nisi haberet cui malediceret;\nIs sibi responsum hoc habeat; in medio omnibus\nPalmam esse positam qui artem tractant musicam.\nIlle ad famem hunc ab studio studuit reicere:\nHic respondere voluit, non lacessere.\nBenedictis si certasset, audisset bene.\nQuod ab ipso allatum est, sibi esse id rellatum putet.\nDe illo iam finem faciam dicendi mihi,\nPeccandi quum ipse de se finem non facit:\nNunc quid velim animum attendite. Apporto novam\nEpidicazomenon qnam vocant comoediam\nGraeci, Latini Phormionem nominant;\nQuia, primas partes qui aget, is erit Phormio\nParasitus, per quem res agetur maxime,\nVoluntas vestra si ad poetam accesserit.\nDate operam: adeste aequo animo per silentiumr;\nNe simili utamur fortuna atque usi sumus\nQuum per tumultum noster grex motus loco est;\nQuem actoris virtus nobis restituit locum,\nBonitasque vestra adiutans atque aequanimitas.","prev":null,"next":{"citation":"Phormio 1.1","label":"Act 1","url":"https://interlinea.aeterna-institute.org/library/latin/terence/phormio/1.1","api":"https://interlinea.aeterna-institute.org/api/v1/library/latin/terence/phormio/1.1"},"credit":{"text":"Terence, Phormio, ed. Edward St. John Parry. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0134/phi004/phi0134.phi004.perseus-lat2.xml","quality":"proofread"}}