{"kind":"section","lang":"la","language":"Latin","title":"De magnete 136","citation":"William Gilbert, De magnete 136","ref":"136","level":null,"urn":null,"url":"https://interlinea.aeterna-institute.org/library/latin/william-gilbert/de-magnete/136","api":"https://interlinea.aeterna-institute.org/api/v1/library/latin/william-gilbert/de-magnete/136","markdown":"https://interlinea.aeterna-institute.org/library/latin/william-gilbert/de-magnete/136.md","author":{"name":"William Gilbert","url":"https://interlinea.aeterna-institute.org/library/latin/william-gilbert"},"work":{"title":"De magnete","url":"https://interlinea.aeterna-institute.org/library/latin/william-gilbert/de-magnete","urn":null},"verse":false,"words":229,"text":"Quare FE pars non attrahitur in suam foueam antiquam; sed vt primùm vaga fuerit & distans, allicitur à contrario polo. At si particula FE, rursus reposita fuerit in foueâ suâ, aut propè admota sine medijs interpositis, combinationem acquirit pristinam, & totius pars rursus vnita, cum toto conspirat, & libenter in pristinâ positione cohaeret; atque E versus A, & F versus B manent, & in matris gremio constanter acquiescunt. Eadem est ratio cùm lapis in aequales per polos diuiditur partes. Sphaericus lapis diuiditur in duas aequales partes per axem AB; siue igitur AB superficies in alterâ parte supina fuerit (vt in priore diagrammate) siue in ambabus prona (vt in posteriore) A finis tendit versus B. Sed intelligendum etiam est, quòd non certo aspectu semper ad punctum B fertur A, quia verticitas processit ex diuisione in alia puncta, veluti in FG; vt apparet in capite decimoquarto huius libri. Et LM iam sunt in vtroque axes; nec ampliùs est AB axis: Nam magnetica corpora vt primùm diuiduntur, singula fiunt magnetica & integra; verticesque habent pro molis ratione, nouis polis ex diuisione vtrinque assurgentibus. Axis tamen & poli semper sequuntur meridiani duc tum; quia vis illa extenditur per meridianos lapidis ab aequinoctiali in polos, instituto perenni, virtute ingenitâ materiae conuenienti ex longâ & diuturnâ positione & prospectu corporis idonei versus polos telluris; à cuius viribus per multa saecula continuatis informatur, in cuius certas & destinatas partes ab origine sua, firmiter & constanter conuersa permansit.","prev":{"citation":"De magnete 135","label":"LIBER","url":"https://interlinea.aeterna-institute.org/library/latin/william-gilbert/de-magnete/135","api":"https://interlinea.aeterna-institute.org/api/v1/library/latin/william-gilbert/de-magnete/135"},"next":{"citation":"De magnete 137","label":"LIBER","url":"https://interlinea.aeterna-institute.org/library/latin/william-gilbert/de-magnete/137","api":"https://interlinea.aeterna-institute.org/api/v1/library/latin/william-gilbert/de-magnete/137"},"credit":{"text":"William Gilbert, De magnete. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/De_magnete","quality":"ocr"}}