{"kind":"passage","lang":"la","language":"Latin","title":"The Wolf and the Lamb","citation":"Phaedrus, Fabulae 1.1","ref":null,"level":2,"urn":"urn:cts:latinLit:phi0975.phi001.perseus-lat2:1.1","url":"https://interlinea.aeterna-institute.org/read/latin/phaedrus-wolf-lamb","api":"https://interlinea.aeterna-institute.org/api/v1/passages/latin/phaedrus-wolf-lamb","markdown":null,"author":{"name":"Phaedrus","url":null},"work":{"title":"Fabulae","url":null,"urn":null},"verse":true,"words":91,"text":"Ad rivum eundem lupus et agnus venerant\nsiti compulsi; superior stabat lupus\nlongeque inferior agnus. Tunc fauce improba\nlatro incitatus iurgii causam intulit.\n“Cur,” inquit, “turbulentam fecisti mihi\naquam bibenti?” Laniger contra timens:\n“Qui possum, quaeso, facere, quod quereris, lupe?\nA te decurrit ad meos haustus liquor.”\nRepulsus ille veritatis viribus:\n“Ante hos sex menses male,” ait, “dixisti mihi.”\nRespondit agnus: “Equidem natus non eram.”\n“Pater hercle tuus,” ille inquit, “male dixit mihi.”\nAtque ita correptum lacerat iniusta nece.\nHaec propter illos scripta est homines fabula,\nqui fictis causis innocentes opprimunt.","prev":{"citation":"Fabulae Faciles, Perseus 1","label":"The Ark on the Sea","url":"https://interlinea.aeterna-institute.org/read/latin/ritchie-perseus-ark","api":"https://interlinea.aeterna-institute.org/api/v1/passages/latin/ritchie-perseus-ark"},"next":{"citation":"Breviarium ab urbe condita 1.2","label":"Romulus Builds a City","url":"https://interlinea.aeterna-institute.org/read/latin/eutropius-romulus","api":"https://interlinea.aeterna-institute.org/api/v1/passages/latin/eutropius-romulus"},"credit":{"text":"Phaedrus, Fabulae 1.1. CC BY-SA 4.0. Perseus Digital Library (Tufts University), PerseusDL/canonical-latinLit; edition: L. Müller, Teubner 1876; speech marks added","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://scaife.perseus.org/reader/urn:cts:latinLit:phi0975.phi001.perseus-lat2:1.1/","quality":"proofread"}}