# De locutionum pravitatibus (posterior pars operis) [Sp.] (fort. auctore Corneliano) (e cod. Paris. suppl. gr. 1238) 74

Aelius Herodianus, De locutionum pravitatibus (posterior pars operis) [Sp.] (fort. auctore Corneliano) (e cod. Paris. suppl. gr. 1238), Page 74. Ancient Greek.

Canonical: https://interlinea.aeterna-institute.org/library/greek/aelius-herodianus/de-locutionum-pravitatibus-posterior-pars-operis-sp-fort-auctore-corneliano-e-co/74

Ἀριστογείτων ἐν τῷ κατὰ Τιμοκράτους· «ὡς οὐδεπώποτε δώσει δίκην» (=Philet. § 255). —Πλὴν εἰ τόδε οὕτω συντάξεις ἢ εἰ μὴ τόδε. Οὐκέτι δὲ ἀμφότερα παραλήψῃ. Τὸ μὴ γὰρ καὶ τὸ πλὴν ἀμφότερα ἀρνητικά ἐστι καὶ οὐ δύναται ὁμοῦ πίπτειν (=Philet. § 134). —Τὸ ἀντικρύ ἐστιν ἐπίρρημα τοπικόν, ὃ καὶ μετὰ τοῦ σ καταγράφεται· οἷον ἀντικρὺ κάθηται, καταντικρὺ Ἀθηνῶν· τὸ δὲ ἄντικρυς ἐπὶ τοῦ φανερῶς· καὶ ἄνευ δὲ τοῦ σ εἴρηται παρὰ τῷ Ἀλεξάνδρῳ (Η 362), ἄντικρυς ἀπόφημι καίτοι τοῦ μέτρου ἐγχωροῦντος. —Μάτην ᾐτιάσατο δεῖ λέγειν, οὐχὶ ματαίως· μόνως γὰρ οὕτω καὶ παρὰ τοῖς ἀρχαίοις, ὡς ἐν ταῖς Νεφέλαις (v. 1436) Ἀριστοφάνης· μάτην ἐμοὶ κεκλαύσεται ... —Ἁμαρτάνουσιν οἱ λέγοντες κἀγὼ εἶπον, κἀμοὶ δός. Δέον ὁλοκλήρως ἐκφέρεσθαι τὸν καὶ σύνδεσμον ὅλον· καὶ ἐγὼ εἶπον, καὶ ἐμοὶ δός. Συναλοιφὴν γὰρ ὁ καὶ σύνδεσμος πάσχειν οὐ δύναται· οὐδέ ἐστιν, οὐδὲ ἐλλείπει παρὰ τοῖς πολιτικοῖς, ἀλλὰ παρὰ τοῖς ποιηταῖς μόνον. Εὐριπίδης (Androm. 936)· κἀγὼ κλύουσα τούσδε Σειρήνων λόγους·

---

Aelius Herodianus et Pseudo-Herodianus Gramm. et Rhet., De locutionum pravitatibus (posterior pars operis) [Sp.] (fort. auctore Corneliano) (e cod. Paris. suppl. gr. 1238). Text: The Greek Library, from the Perseus Digital Library and other open sources, CC BY 4.0. Changes: apostrophes normalised and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://thegreeklibrary.pages.lisn.upsaclay.fr/works/tlg0087.tlg038.local001/.