# Περὶ παρωνύμων 2.330-337

Aelius Herodianus, Περὶ παρωνύμων, 2.330 to 2.337. Ancient Greek.

Canonical: https://interlinea.aeterna-institute.org/library/greek/aelius-herodianus/text-16/2.330

Βόϲποροϲ. τὸ ἐθνικὸν Βοϲπόριοϲ καὶ Βοϲποριανόϲ καὶ Βοϲπορανόϲ καὶ Βοϲπορηνόϲ. διχῶϲ γὰρ καὶ διὰ τοῦ α καὶ διὰ τοῦ η ὡϲ Τιβαρανόϲ καὶ Τιβαρηνόϲ. Ἕφοροϲ ἐν πέμπτῳ Τιβαρηνοὶ καὶ τὸ παίζειν καὶ τὸ γελᾶν εἰϲιν ἐζηλωκότεϲ καὶ μεγίϲτην εὐδαιμονίαν τοῦτο νομίζουϲιν. ὅμοροι δὲ τούτοιϲ Χάλυβεϲ καὶ τὸ τῶν Λευκοϲύρων ἔθνοϲ». Γέα πόλιϲ ἐν Ἀραβίᾳ. τὸ ἐθνικὸν Γέϊοϲ. κατὰ ἀναλογίαν δ’ ἔδει Γεάτηϲ ὡϲ Τεγεάτηϲ. Γέργιϲ Γέργιθοϲ πόλιϲ Τροίαϲ. λέγεται καὶ ἡ Γέργιθοϲ. ὁ πολίτηϲ Γεργίθιοϲ. ἔϲτι καὶ ἄλλο Γεργίτηϲ. ἔϲτι καὶ Γεργιθεύϲ. Γρηϲῖνοϲ πόλιϲ Χερρονήϲου. τὸ ἐθνικὸν Γρηϲίνιοϲ, ὡϲ Ἀνδροτίων ἕκτῳ Ἀτθίδοϲ. Δαύνιον πόλιϲ Ἰταλίαϲ. τὸ ἐθνικὸν Δαύνιοι καὶ Δαυνῖται κατὰ ϲυγκοπὴν ἀπὸ τοῦ Δαυνιᾶται. Δῆλοϲ. Δήλιοϲ. καὶ Δηλίτηϲ ὁ εἰϲ Δῆλον ἐρχόμενοϲ χορόϲ, Καλλίμαχοϲ τρίτῳ. Δριλώνιοϲ πόλιϲ Κελτική. τὸ ἐθνικὸν Δριλώνιοϲ ὡϲ Θεόπομποϲ μγ΄. Δρυμία πόλιϲ Φωκίδοϲ. Παυϲανίαϲ ι΄ (c. 33, 12) «Δήμητροϲ δὲ θεϲμοφόρου Δρυμίοιϲ ἱερόν ἐϲτιν ἀρχαῖον». τὸ ἐθνικὸν Δρυμιεύϲ ἐκ τοῦ θηλυκοῦ καὶ τοῦ οὐδετέρου.

---

Herodianus, Περὶ παρωνύμων, ed. August Lentz. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg0087.tlg026.local001/.